BISAN sa rekomendasyon sa City Engineering Office (CEO), wa gihapon gi-terminate o gibakwi sa kagamhanan sa siyudad sa Mandaue sa miaging administrasyon ang mga kontrata sa pipila ka mga proyekto nga kinatibuk-ang nagkantidad og P13.5 milyones.
Kini ang nakaplagan sa Commission on Audit sa review sa Report on Quarterly Government Projects sa CEO alang sa quarter nga natapos niadtong Disyembre 31, 2018.
Sa maong report, nasuta sa mga state auditor nga girekomendar sa CEO ang pagbakwi sa kontrata sa pipila ka mga proyekto tungod sa mga suliran sa road-right- of-way (RROW).
Gawas niini, way aprobado nga budget alang sa rehabilitasyon sa karsada human gitangtang ang kasamtangang asphalt project ubos sa Special Local Road Fund (SLRF).
Sa 2018 annual audit report sa COA, nasuta nga ang mga proyekto naglakip sa bag-ong market bridge construction (P5.29 milyones), pagtangtang sa kasamtangang asphalt overlay sa dan S.B. Cabahug (P445,523), konstruksyon ug rehabilitasyon sa drainage canal sa Purok Ampalaya sa Barangay Cambaro (P2.69 milyones) ug road concreting ug riprapping works uban sa cross culvert sa dan B. Suico sa Barangay Tingub (P5.1 milyones).
Dugang sa report 71 porsyento lang ang kahumanan sa konstruksyon ug rehabilitasyon sa drainage canal sa Purok Ampalaya, samtang 45 porsyento sa road concreting sa dan B. Suico ug wala masugdi ang konstruksyon sa bag-ong market bridge ug pagtangtang sa kasamtangang asphalt overlay sa dan S.B. Cabahug.
Nahibaw-an sa mga state auditor gikan sa mga personnel sa CEO nga ang mga proyekto technically impractical o dili mahinungdanon sanglit ang project area kay maapektuhan sa tukoron nga gisugyot nga government center.
Base sa Annex A sa Resolution NO. 018-2004 sa Government Procurement Policy Board (GPPB) pinetsahan og Disyembre 22, 2004, ang pangu sa procuring entity mahimo nga maka-terminate sa kontrata pabor sa gobiyerno kon iyang matino nga ang pagpatuman sa proyekto kay dili economically, financially o technically impractical ug mahinungdanon ingon man dunay kausaban sa balaod ug mga polisiya sa nasudnong kagamhanan.
Matod sa COA, ang officer-in-charge sa CEO sa miaging administrasyon nihangyo na nga bakwion o kanselahon ang mga kontrata apan wala pay nadawat nga tubag gikan sa City Planning and Development Office kabahin sa clearance alang sa RROW.
Nirekomendar ang mga state auditor sa Siyudad nga bakwion o i-terminate ang mga kontrata sa mga proyekto nga dunay mga problema sa RROW ug mopahigayon og detailed engineering aron pag-establisar sa technical viability ug kon nahisubay ba kini sa mga lagda sa paggamit sa luna ug zoning nga gitakda sa mga balaod. (SCG)