KINATIBUK-ANG P373,013,986.18 nga pundo ubos sa 20 porsyento nga development fund sukad sa 2013, ang pabilin wa gastoa sa kagamhanan sa dakbayan sa Toledo, sumala sa Commission on Audit (CA).
Matod sa mga state auditor, tungod sa wala paggasto sa Siyudad sa maong pundo nga gigahin alang sa nagkadaiyang mga proyekto, nahikawan ang mga konstituwente nga makatagamtam sa mga benepisyo nga dala niini.
Ang mga opisyal sa Siyudad nipasabot nga gumikan sa pag-usab-usab sa local chief executive human suspensoha sa Ombudsman si kanhi Toledo City Mayor John Henry Osmeña ug nabalik sa pwesto, wa mapatuman ang mga proyekto nga naplanohan na.
Si Osmeña gisuspenso og usa ka tuig sa Ombudsman gumikan sa grave abuse of authority human pasanginli nga nagdumili paghatag sa quarterly nga bahin sa real property tax sa Barangay Daanlungsod niadtong 2017.
Niadtong Septiyembre 14, 2017, nagsugod ang suspension ni Osmeña ug nilingkod sa puwesto si kanhi Bise Mayor Antonio Yapha Jr. Apan human sa walo ka buwan, nibalik sa pwesto niadtong Mayo 2018 human gibali sa Court of Appeals 19th Division.
Sa review sa COA sa Statement of Appropriation, Allotments, Obligations and Balances sa Siyudad, nagpakita nga gikan sa kasamtangan ug continuing appropriations, 46 porsyento lang o P315,658,572.53 ang na-obligate na gikan sa kinatibuk-ang P688,672,558.71.
Kini nagpasabot nga may appropriation balance pa nga kapin sa P373 milyones.
Apil sa mga proyekto nga wa mapatuman, ang pagpalambo sa Toledo City Hospital nga gigahinan og P33.5 milyones nga pabilin wa gamita ang pundo.
“This may mean additional work load for the implementing offices in succeeding year. It may also render the programs irrelevant especially those projects programmed in prior years which still remain unimplemented,” dugang sa COA.
Alang sa 2018, ang Siyudad sa Toledo nigahin og kinatibuk-ang P440,687,236.68 ubos sa 20 porsyento nga development fund nga gikan sa unom ka supplemental budget.
Lakip sa mga proyekto niini ang P26.598 milyones nga pag-abli og dalan gikan sa nasudnong karsada ngadto sa Sitio Catera, P26 milyones nga konstruksyon sa drainage system atubangan sa walang bahin sa dan S. Osmeña agi sa nasudnong karsada paingon sa Sapangdaku River ug titling ug uban pa.
Sa continuing appropriations, apil dinhi ang pundo alang sa barangay development projects, P350,000 sa 2015, P294,597.03 sa 2016 ug P468,004.08 sa 2017, P17 milyones pagpalit og luna alang sa right-of-way, relocation survey niadtong 2013 ug uban pang mga proyekto.
Ang COA nirekomendar sa mga opisyal sa siyudad nga mandoan ang mga buhatan sa kagamhanan sa pagpatuman sa naplanohan nang proyekto sa tuig ug moduso og accomplishment reports matag buwan ug matag quarter ngadto sa City Planning and Development Coordinator. (SCG)