UPAT ka mga tawo ang pasakaan og kasong kalapasan sa Republic Act (RA) 9165 o Comprehensive Dangerous Drugs Act of 2002 kabahin sa naibot sa awtoridad nga 10 mil ka tanom nga marijuana ug nasakmit nga 5 mil ka seedlings sa pagronda sa plantasyon sa bukitang barangay sa Langosig, dakbayan sa Danao, niadtong Sabado, Hulyo 27, sa alas 2:15 sa hapon.
Base sa Facebook post sa Danao Police Station, ang operasyon kabahin sa Oplan Limpyo Danao III nga gipangulohan ni Station Chief PLT Col. Maribel B. Getigan.
Ang operasyon hiniusang gilusad sa kapulisan sa Danao ug mga sakop sa Provincial Mobile Force Company (PMFC).
Atol sa pagronda, nadakpan ang usa sa mga suspek nga nag-atiman sa plantasyon sa marijuana nga si Jolito Lawa Landero, 39, ug molupyo sa naasoyng barangay ug Renerio Lato Cal, 49, taga Barangay Lawaan.
Laing duha ang nakasibat nga sila si Isidro Martel, hamtong, ug molupyo sa Barangay Lawaan ug Apolicronio Lawa, Jr., 49, taga Langosig.
Lakip sa nasakmit mao ang kagamitan sa pagtanom og marijuana sama sa duha ka mga dagkong gallons, tulo ka bolo, improvised dipper ug uban pa.
Dugang sa post sa kapulisan, usa ka babaye nga nailang si Gina T. Cal ang niabot sa dapit ug niinterbiner sa operasyon uban sa pagsuway og santa nga dili madala sa awtoridad ang lalake nga suspek.
Ang maong babaye pasakaan usab og tukmang kaso sa kapulisan. Ang malampusong operasyon sa kapulisan gilusad human nasuta nga positibo ang tip sa mga nagpakabanang molupyo sa dapit.
Sila si Landero ug Cal gibalhog sa selda sa kapulisan sa Danao nga gipaabot nga pasakaan og kaso karong Lunes, Hulyo 29, samtang ang laing duha ka mga suspek gipangita sa kapulisan.