DILI alarming ug kontrolado ra ang sitwasyon sa Negros Oriental bisan pa man niabot na og 17 ka mga biktima sa pagpamusil sa maong probinsya sulod lang sa usa ka semana.
13 na ka insidente sa pagpamusil sukad Hulyo 23 hangtud Hulyo 28.
Kini ang giklaro sa pangulo sa Police Regional Office (PRO)-Central Visayas Police General Debold Sinas, human sa iyang pakighinabi sa 25 ka mga chief of police sa syudad ug lungsod nga sakop sa Negros Oriental Provincial Police Office (Noppo).
Apan giangkon ni Sinas nga tulo sa 13 ka mga insidente sa pagpamusil, gitan-aw nila nga mga sakop sa Communist Party of the Philippines-New People's Army-National Democratic Front (CPP-NPA-NDF) ang nagpaluyo niini.
Human nga mismo ang mga kabanay ug mga saksi ang nitudlo.
Usa niini ang pagpatay nila Weny Alegre ug Felimon Janayan sa Barangay Calango, Zamboagita, barangay kapitan sa Buenavista, Dakbayan sa Guihulgan, Romeo Alipan.
Ang ikatulo nga insidente naglambigit sa mag-amahan nga sila Marlon ug Marjun Ocampo, sa lungsod sa Sta. Catalina.
Apan alang sa ubang insidente, kasagaran niini gitan-aw ang may kalambigitan sa away sa yuta.
Samtang ang ika-17 nga gipatay nahitabo alas 3:05 Domingo sa hapon, Hulyo 28 diha sa Oval Public Market, Barangay Panubigan, Canlaon City.
Ang biktima giila nga si Anaciancino Rosalita, barangay tanod sa Barangay Bucalan, Canlaon City.
Padayon pa ang gihimo nga pakisusi sa kapulisan.
Giklaro usab ni Sinas nga aduna na silay gihimo nga mga istratehiya nga dili na kini mapun-an pa.
Ila usab giawhag ang publiko nga magbinantayon ug mo-coordinate gyud sa kapulisan alang sa dinaliang pagpakgang.