BINILANGGO sa Mandaue City Jail male dormitory namatay human dunggaba sa kaubang piniriso samtang nagduwa og basketball sulod sa pasilidad, Lunes alas 10 pasado sa buntag, Hulyo 20.

Giingon nga ang biktima sakop sa usa ka giingong drug lord nga gipatay niadtong 2018 sulod gihapon sa jail.

Patay na nga naabot sa tambalanan si Romy Ramas, 33, human gidunggab og improvised bladed weapon sa likod sa iyang lawas samtang nagduwa og basketball.

Si Ramas nabalhog niadtong Mayo 2017 sa kaso nga illegal drugs.

Sa pasiunang kasayuran gikan kang assistant jail warden, Mark Toñacao, ilang gisusi ang posibilidad nga dunay kontra si Ramas sa sulod sa prisohan.

Ilang nadawat ang alarma mga alas 10:42 sa buntag ug naabtan nila si Ramas nga nagbuy-od.

“Taod-taod na na siya gyud. Posible sad nga usa ra sa iyang kauban ang naghimo. Posible nga naa na siya’y kontra sa sulod kay sila sila ra man gud ang naa diha (male dorm),” matod ni Toñacao

Unang taho nga ilang nadawat nga dunay gipusil nga inmate.

Apan wa sila makadungog og tulo ka sunodsunod nga mga buto sa armas nga maoy unang sumbong sa mga residente sa palibot.

Sulod sa basketball court, wa silay nakitang kabhang sa armas nga timailhan nga gipusil si Ramas.

Wa pa usab silay nakitang hait nga hinagiban.

Sa pagsuwat ning taho, wa pa silay natumbok nga killer.

Human sa hitabo, ilang giisa ang red alert sa tibuok jail.

Wa una silay gitugotan sa pagdalaw.

Gitugyan na sa Bureau of Jail Management and Penology (BJMP) Mandaue ang pagpahigayon og imbestigasyon ngadto sa kapulisan.

Gitug-an ni Mandaue City Police Office Director, Police Colonel Jonathan Abella, nga nilutaw ang ngan ni Ramas nga usa sa mga tawo ni Steve Go, giiilang drug lord.

Si Go gipusil patay ni Cresenciano Heyrana sulod usab sa Mandaue City Jail niadtong Hunyo 19, 2018.

Mga sakop ni Go ang gipangtumbok nga nagpaluyo sa mga pinatyanay karon sa Dakbayan sa Talisay. Giingon sa kapulisan nga nag-unay ang mga ginsakpan ni Go.

Ang tulo ka mga tawo nga gipamatay sa Dakbayan sa Talisay gipangtumbok nga mga sinaligan kaniadto ni Go.