KASONG murder ang ipasaka sa kapulisan batok sa usa ka 21 anyos nga babaye nga giilang "drug queen" sa Talisay City.
Ang babaye nga giili nga si Divine Grace Dandan maoy usa sa gitudlong likud sa usa sa pagpusil-patay sa syudad sa Talisay sa niaging semana.
Base sa nakuha nga closed-circuit television footage, si Dandan mao ang babaye nga nitudlo kang Jeber Jerusalem una kini gipusil niadtong Hulyo 12 sa gawas sa usa ka Apartelle sa Barangay Cansojong, Talisay City.
Si Dandan, kinsa nasikop niadtong Hulyo 25 sa Provincial Intelligence Branch (PIB), sa Upper Linao, syudad sa Talisay, ang giila nga kanhi hinigugma sa napatay nga drug lord nga si Steve Go.
Kini usab ang gitumbok nga kapuyo sa nibanos kang Go nga si Girlie Luage, kinsa napatay usab niadtong Abril 29, 2019.
Nasuta usab nga si Dandan nahimo nga kapuyo ni Jerh Sigue, ang napalgan nalang nga patay niadtong Hulyo 26. Nakaangkon si Sigue og mga samad pinusilan ug gigaid sa usa ka poste sa kuryente.
Si Sigue ang giila sa mga pulis nga maoy nipusil kang Jerusalem, ug sa uban pang patay sa syudad.
Sa nakuha nga impormasyon sa Talisay City Police Station, si Dandan ang kanunay nga tig-abangan og lawak sa nagkadaiyng apartelle ug motel, diin giingon himuon ang mga transaksyon sa ilegal nga drugas.
Siya usab ang gitumbok nga usa sa responsable sa padayon nga pag-apud-apud sa drugas sa Talisay ug silingang lungsod ug syudad.
Apan bisan pa sa pagkasikop ni Dandan, dili gihapon kampante ang Talisay police kay dako ang pagtuo ni Police Major Orlando Carag Jr., ang hepe, nga adunay handler si Dandan, hinungdan nga padayon ang gihimo nga pagpakig-alayon sa Talisay police sa PIB alang sa pagsikup sa kauban sa babaye.
Atol sa pagkasikop ni Dandan, nakuhaan kini og dul-an sa P70,000 nga balor sa ilegal nga drugas. (FMD)