STL. Ang orden ni Presidente Duterte nga nagpaundang sa operasyon sa lotto, Small Town Lottery (STL), nga ubos sa Philippine Charity Sweepstake Office (PCSO) nga napakugang sa tanan labina sa mga operator sa mga outlet sa STL ug lotto, nagpasabot lang nga tinuod gyud diay ang storya nga dunay mga binuang kon korapsyon sa pagpadagan sa lotto labina sa STL.
Gani, sa panahon nga dunay modaug og dagko na kaayo nga premyo sa lotto nga moabot na sa P500 milyones ngadto sa usa ka bilyon daghan ang magduda nga ang midaug iya ra nga mga tawo sa opisyales sa PCSO tungod kay di man ipublikar ang ngan sa mananaug dili sama didto sa Amerika.
Dako ko og pagtuo nga ang bag-o nga PCSO general manager, Police Col. Royina Garma, ang mirekomendar ni Presidente Duterte nga undangon usa ang operasyon sa bola sa mga lotto ug STL tungod sa daghan nga isyu. Si Col. Garma mao ang kanhi hepe sa Cebu City Police Office, nga bag-o lang nga miretiro ug gitudlo ni Presidente Duterte nga puli ni kanhi Manager Alexander Balutan.
Pipila ka adlaw human gitudlo ni Presidente Duterte si Sandra Cam, nga usa sa mga commissioner sa PCSO, mipabuto dayon siya og isyu nga dunay korapsyon ang opisina niini, nga dako kaayo og kita tungod sa pagpadagan sa lotto, Keno ug STL. Apan si Presidente Duterte wa mohatag og bili sa gipabuto ni Sandra Cam.
Bisan sa pagpanghimakak ni Balutan apan daghan ang dili motuo nga wa siya gipalagpot ni Presidente Duterte. Matod pa ni Balutan miundang ra man siya sa pwesto. Ang kadaghanan nagtuo nga tungod sa pagbulgar ni Cam sa mga tinonto sa operasyon sa PCSO mao nga miundang na lang si Balutan.
Sa atong nag gikaingon nga pagpaundang ni Presidente Duterte sa operasyon sa lotto ug STL posible nga girekomendar ni Garma human niya masuta nga duna gyud diay mga kabuang sa pagpadagan sa lotto ug STL nga mokita og binilyon ug pinisik ra ang mosulod sa panudlanan sa kagamhanan.
Ang STL gimugna aron pagsulbad sa ilegal nga sugal sama sa masiao, nga maoy kusog dinhi sa Visayas ingon man sa Mindanao ug ang jueting didto sa Luzon. Sa pagsugod sa STL nakita nga nakapamenos sa masiao ug jueting. Apan pipila ka tuig ang milibay ang jueting lord sa Luzon mao nay nagpadagan sa STL ug pisik ra sa binilyon nga kita ang gitunol sa PCSO.
Ang usa sa posibli nga hinungdan nganong nakontrobersiya ang operasyon sa STL tungod kay ang kadaghanan nga nagpadagan niini mga retirado nga opisyal sa pulis ug sundawo, nga maingon nato nga kuwang sa kahibawo sa pagpadagan og negosyo sama sa STL unya duol sa tentasyon sa kurapsyon tungod sa kadako sa kita niini.
Si Gob. Gwendolyn Garcia ug Cebu City Mayor Edgar Labella sa ilang tagsa-tagsa nga pamahayag uyon nga undangon ang operasyon sa lotto ug STL tungod sa kurapsyon.
Sa iyang text message ngadto sa SunStar Cebu, si Gobernador Gwen miingon, “Ang dinagko kaayo nga kurapsyon sa PCSO, PNP, LGUs, ug uban pa dili mahatagan og igo nga katarungan tungod lang sa amot nga gipanghatag niini.
Ang sugal makadunot ug ang legal nga sugal naghimo na hinuong nga legal ang pagpanglimbong.”