DAGHAN ang nasagmuyo nga mga mamumuo sa dihang gibasura o gi-veto ni Presidente Rodrigo Duterte ang balaodnon nga magwagtang unta sa contractualization nga pagpanrabaho sa atong mga kaigsuonan.
Ubos unta sa Security of Tenure Bill kon Endo, ang tanang mga trabahante mahimo na untang regular employees ug makabaton na unya sila og seguridad sa ilang pagpangempleyo.
Wa na untay mga empleyado nga magsigi og renew sa ilang kontrata kon kini mo-expire na.
Ang Endo Bill maoy usa sa mga kampanya sa presidente sa 2016 election nga gihangop sa mga mamumuo.
Pero, ambot ug sa unsang pagka unsaa, nga sa dihang napasar na kini sa kongreso ug sa senado, gikasurprisa na man hinuon sa mga magbabalaod, human kini gi-veto sa Presidente niadtong Biyernes.
Ang presidente mipasabot nga dili balanse ang nalatid sa maong balaodnon kay nasentro lang ang daghang pabor ngadto sa mga mamumuo ug wala mapanalipdi ang interes sa mga kapitalista.
Matod niya nga samtang idili unta nga kontratahon ang mga mamumuo, apan tugotan lang sab kapitalista nga makahimo og lihetimong pagpangontrata sa trabaho.
Pero kinahanglan nga ang kontraktor adunay igong kapabilidad nga makahatag sa iyang mga empleyado og saktong benepisyo.
Si Senador Joel Villanueva, ang chairman sa Senate labor committee, ug ang ubang mga magbabalaod wala mawad-i sa ilang paglaom ug mipasaka kini og balik sa Security of Tenure bill.
Ning higayona, ingon ni Villanueva, nga aduna nay kausaban sa balaodnon nga iyang gibalik pagpasaka kagahapon.
Wala motino ang senador kon unsay kausaban nga iyang gipaslak sa maong balaodnon.
Hinaot nga kini usa na ka balanse nga balaodnon nga makombinsi na sa presidente.