MOSUWAY’G bangon gikan sa grabeng pagkapandol ang Cebu Sharks sa ilang pagpakigsangka sa Makati Super Crunch sugod karong alas 4:00 sa hapon sa Maharlika Pilipinas Basketball League (MPBL) Lakan Cup sa Muntinlupa Sports Complex.
Ang Sharks gikan sa dakong kapildihan batok sa Mindoro Tamaraws, 73-94, niadtong Hunyo 22 nga maoy nagpahagsa sa ilang rekord ngadto sa 3-4 nga rekord.
Mao kini ang labing dakong kapildihan nga naangkon sa Sharks ning maong season.
Batok sa Super Crunch, nga adunay 4-1 nga rekord, gilauman nga makasugat ang Sharks og hugot nga pagsuway.
“Lig-on sab na ang Makati pero makaya ra man nato,” matod ni Sharks coach Titing Manalili.
Ang nakaapan lang, matod ni Manalili, upat sa iyang mga magduduwa ang adunay angol lakip na ang ilang labing sinaligan nga si Patrick Cabahug.
Gawas kang Cabahug, aduna sab angol sila si Joel Lee Yu, Eliud Poligrates ug Kraniel Viloria.
“Adjust lang gyud ta ani. Ako giingnan bitaw ang akong players especially ang mga bag-o nga mo-step up gyud gyud,” matod ni Manalili.
Modala sa dakong obligasyon alang sa Sharks mao sila si Rhaffy Octobre, William McAloney, Victor Nuñez, ug Gayford Rodriguez. (ESL)