ANG Cebu City Legal Office nirekomendar ngadto sa Sangguniang Panlungsod sa pagpahigayon og imbestigasyon batok mga opisyal ug trabahante sa Barangay Zapatera sa paglabay nila og basura sa bakanteng luna sa dalan General Echavez.
Ang aktwal nga paglabay sa basura nakuhaan og video nga gi-upload sa social media site ug nag-trending niadtong Hulyo 17.
Base sa pasiunang imbestigasyon nga gipangulohan ni City Legal Officer Rey Gealon, nasuta nga tinuod ang video.
Ang sakyanan nga dunay plate number SKV 301 nga maoy gigamit sa paglabay gipanag-iya sa Barangay Zapatera.
Niadtong Hulyo 18, ang City Environment and Natural Resources Office ubos sa pagdumala ni Atty. Jigo Dacua niisyu og citation ticket batok ni Kapitan Francisco Benedicto ug Joseph Arnejo gumikan sa laing insedente sa pagkatag sa basura duol sa barangay hall.
Si Gealon nagkanayon nga kini nakalapas sa Section 48 (1) kun littering ug sa Section 48(9) kun open dumping nga pulos nalatid sa RA 9003 kun Ecological Solid Waste Management Act ug kalapasan sa City Ordinance 1361.
Gidugang sa city attorney nga ang padayon nga pagtambak sa basura sa vacant lot gidili ubos sa Section 38 sa RA 9003.
Ang tawo mahimong makamulta og P500,000 ug laing 5% apan di molapas sa 10% sa iyang annual net income sa niaging tuig
“Finding overwhelming evidence against the Zapatera barangay captain, et al, the city legal office respectfully recommends to the Sangguniang Panglungsod to conduct a full-blown investigation in the exercise of the August body’s investigative and disciplinary powers under the Local Government Code,” padayag ni Gealon.
Sa iyang tubag niadtong Hulyo 19, si Benedicto, sa iyang suwat kang Dacua, nagkanayon ang lugar gihimo nga temporary garbage pick-up point area.
Ang mga basura nga nakolekta sa Zapatera didto gitapok hangtod nga kuhaon sa truck sa Department of Public Services (DPS).
Apan si Gealon nagkanayon nga aduna gihapon silay tulobagon sa balaod sanglit ang temporary garbage pickup point area nagkinahanglan og environmental compliance certificate (ECC) kay makonsiderar nga transfer station.