MAG Angkas driver ningsunod sa regulasyon nga gitakda sa Department of Transportation (DOTr) samtang, ang mga habalhabal driver wala mapahibalo bahin niini.
Matod ni Joseph Lapiz, usa ka drayber sa Angkas molupyo sa Barangay Inayawan nga misunod sila sa mga regulasyon sa Angkas nga gitakda sa DOTr tungod kay mamahimo silang tangtangaon sa kompanya kung dili sila mutuman nini, sama sa P20 nga minumum nga pletehan, speed limit nga di motaas sa 60 kph, ug uban pa.
Dugang niya nga nindot ang maong regulasyon tungod kay alang man kini sa kaayuhan sa mga pasahero.
Matod usab ni Jun (dili tinuod nga pangalan), usa ka Angkas nga drayber, dili tanan ang nahatagan og body belt para sa komportable nga pagsakay sa mga pasahero kay dunay uban nga motorsiklo nga wala pa mahatagi og vest-based strap o belt diin gisul-ob kini sa mga drayber og makakupot niini ang pasahero tungod kay gisusi pa ang kondisyon sa motor niini ug ang mga lisensya.
Panghinaot sa mga Angkas driver nga ma-legal na ang pagbayahe tungod kay kung mawagtang ang angkas, daghan usab nga drayber ang makulban og kaldero diin mao ang gisaligan tagsa-tagsa nga pamilya.
Ang DOTr mitakda og General Guidelines for the Pilot Implemetation of Motorcycle Taxis niadtong MAyo alang sa mga drivers sa motorsiko sa Metro Cebu ug sa Metro Manila. (Chello Barellano ug Mary Cathleen Sumayang, CNU Comm Interns)