HUGOT nga ipatuman sa Police Regional Office (PRO) 7 ang tanang ordinansa sa matag siyudad sa tibuok Central Visayas human na tuki na usab ni President Rodrigo Duterte atol sa iyang State of the Nation Address (Sona) ang pagsulbad sa street crimes sulod sa nahabiling tuig sa iyang termino.
Mipagawas usab og kamandoan si PNP Chief Police General Oscar Albayalde sa tanang Police Regional Office lukop nasud nga estriktong ipatuman ang tanang ordinansa sa matag dakbayan.
Tungod niini, matod ni Police Brigadier General Debold Sinas, nga ila na usab nga pahugtan ang pagpatuman ang mga ordinansa sa matag siyudad sa Central Visayas.
Lakip sa ilang hingusgan ang kasamtangan nga PNP nga mao ang Oplan Sita, Oplan Bulabog, Oplan Bakal ug ubang anti criminality operations.
Gimandoan ni General Sinas ang iyang mga sakop nga estriktohon na usab sa pagpatuman ang curfew ilabi na sa mga internet cafe nga adunay gagmay nga mga bata nga bisan sa lawom na nga gabii nag duwa pa.
Mga mag-inom sa daplin sa dalan ug mga mag hukas-hukas sa gawas sa ilang balay ipabadlong na usab kini.
sab nila ang mga mag videoke panahon sa lawom nang gabii nga maka hatag nag katugaw sa mga silingan.
Lakip sa iyang gipa target ang mga video karera machines sanglit mao usab kini ang timailhan nga adunay drugas sa usa ka dapit.
Nabantayan hinuon sa heneral nga gamay nalang ang mamatikdang video karera.
Makig-alayon usab sila sa local government units alang sa kampanya. (AYB)