NIREKLAMO ang lumolupyo sa Sitio Aroma, Barangay Subangdaku, dakbayan sa Mandaue sa giingong pag-harass sa kapulisan sa mga batan-on sa ilang dapit apan, hugot kining gihimakak sa opisyal sa Mandaue City Police Office (MCPO).
Usa ka panagtapok nga gihimo sa mga residente sa naasoy nga dapit, ilang gipadayag ang kalagot sa kapulisan tungod sa pasangil nga harassment.
Niadtong Sabado, Hulyo 27, sa gabii, saysay sa mga residente nga dunay mga lalake nga nipahigayon ug surveillance sa dapit, ug giingong wa kini mag-uniporme.
Giingong gipahukas ang mga batan-on ug gikapkapan .
“Gipahukas man to nila among kauban nya gipahapa nyakato sila nag pahukas kay wa man to nag uniform,” matod sa mga residente.
Sa susamang adlaw, upat ka mga lalaki ang nasikop sa kapulisan sa kasong illegal gambling nga sa pagkakaron anaa natanggong sa Police Station 2 sa brgy. Subangdaku.
Gipangangkon sa mga molupyo nga usa lang kini ka paagi sa barangay ug sa tag-iya sa luna kon asa sila namuyo aron mapapahawa sila.
Nasayran nga ang maong luna gipanag-iya na sa pribadong kompanya.
Gitanyagan usab sila og mobalor sa P15,000 alang na sa ilang pagpahawa nga walay relocation site.
Sa kinatibuk-an nga 700 ka mga indibiduwal nga anaa namuyo sa maong dapit, kapin sa 200 na lang ang nagpabilin sa maong luna human midawat na ug mibalhin na ang mga kaubanan niini.
Gawas niini, giingong giinitan usab sila sa barangay hinungdan nga dili kolektahon ang ilang mga basura.
Gipasabot ni Subangdaku barangay kapitan, Ernie Manatad, nga ilang gitubag ang reklamo sa mga residente pinaagi sa pagbutang og karatola nga “No Segregation, No Collection” human nakita niya nga walay disiplina ang mga residente sanglit gitapok lang ang malata ug di malata nga basura.
“Medyo lahi ilang panan-aw sa barangay, dili sad namo sila mahatag ilang need sa water ug electricity connection kay kinahanglan pa man na sila mananghid sa tag-iyaunya wa man gani sila’y mapakita nga dokumento,” dugang sa kapitan.
Dugang ni Manatad nga dugay na silang gihangyo sa tag-iya nga mopahawa apan nagmagahi gihapon sila.
Si MCPO director, Police Colonel Jonathan Abella nagkanayhon nga walay mangharass ang kapulisan sa mga residente.
Wa hinuon gilimod ni abella nga duna siyay direktiba sa kapulisan nga mosusi sa maong dapit kon duna ba’y mga armas ang mga namuyo sa maong lugar ug kinahanglan nga magsul-ob gyud sa saktong uniporme.
“Naa mi gitawag nga Oplan Bakal, (mang) sita gyud, pero dili na harassment kanang oplan sita everyday na unya mao na kapkapan ang mga tao unya kon duna gani kadudahan diha nata mahibaw nga naay armas, kana kon wan a mag uniform dili na nato tawo,” dason ni Abella.
Hangyo ni Abella sa mga molupyo sa barangay ang kooperasyon. (ANV)