SIYAM ka mga tinun-an sa Can-asujan National High School sa Siyudad sa Carcar nga apil sa “mass hysteria,” ang ipaubos sa Carcar City Division sa Department of Education sa alternative delivery mode (ADM) sugod karong Martes, Hulyo 30, sud sa usa ka buwan.
Matod ni Dr. Christian Nabella, public schools district superintendent sa division, nga mohimo sila og lawom nga imbestigasyon sa sunod-sunod nga mga insidente nga nagsugod niadtong Hulyo 8 sa hapon ug gisundan pagka Hulyo 25 ug 26.
“Kay alarming naman siya, three times naman ni-occur,” ingon niini.
Niadtong Hulyo 8, ang 22 ka mga tinun-an sa Grades 9 ug 10, ang gitabang human giingong nangakuyapan, may nagligidligid ug isog ang tingog, samtang ang uban kay nagsinggit-singgit ug adunay naglisod og ginhawa.
Atol sa pangalawat sa misa sud sa tunghaan niadtong Biyernes sa hapon, Hulyo 26, dunay usa ka estudyante ang kalit nalipong ug gipalingkod, apan kalit lang kini nisiyagit.
Ang laing estudyante nga nakakita niini, kalit usab nisiyagit hangtod nga nagtakodtakod na sa ubang mga tinun-an.
Siyam ka mga estudyante ang gitabang sa maong adlaw samtang 11 niadtong Hulyo 25.
“Ingon sa pari nga mass hysteria ra gyud. Diri man ang pari gud. Ila gyud ipatumaw sa mga bata ug sa mga ginikanan nga na-possess sila, pero wa man gyud,” sumala ni Dr. Maria Ginna Undang, principal sa tunghaan, dihang nahinabi sa Superbalita Cebu niadtong Lunes, Hulyo 29.
Ang misa gipahinungod sa estudyante nga gibunalan og dos-por-dos nga kahoy sa laing tinun-an ug namatay pipila ka tuig na ang nakalabay.
Sigon ni Undang nga nahiling na sa mga doktor sa Cebu Provincial Hospital sa Carcar ang mga tinun-an.
Sa resulta sa test, nasuta nga ang uban sa mga estudyante kay kuwang og potassium ug tubig sa lawas. Duha niini kay malnourished samtang ang uban kay na-stress kay mga partisipante sa Festival of Festival nga kalihokan subay sa kasaulogan sa Charter Day sa Siyudad.
Nabantayan nila ni Nabella ug Undang nga kon mag alas 5 na sa hapon, maulian na ang mga estudyante ug daw sa way nahitabo.
Si Nabella nidugang nga pulos mga maayo sa ilang performance sa tunghaan ang nalambigit nga mga estudyante.
Ubos sa ADM, matod ni Nabella, kon unsa nga activities ug modules ang i-perform sa mga estudyante nga naa sa eskwelahan mao usab ang ihatag sa mga tinun-an nga naa sa ilang mga balay. Adunay magtutudlo nga idestino aron maoy mo-facilitate nila ug kuhaon usab ang ilang output.
Si Nabella nidugang kon kompiyansa na ang mga bata nga mobalik sa tunghaan, di na kinahanglan nga paabton og usa ka buwan ang pagpaubos nila sa ADM.
“Kon ang parents mo-decide gyud nga anhi dinhi, pangitaan sad namo og paagi nga unsaon pag-ensure nga ang bata maprotektahan lang gihapon while inside the school. Basta among gi-look forward ang safety gyud sa bata,” dugang ni Nabella.
Si Padre Daniel Gonzaga, usa sa mga pari nga nitabang sa mga estudyante nga gidala sa iyang gipuy-an sa lungsod sa San Fernando, ang nihangyo nga dili moluwat og pamahayag agi og pagtahod sa confidentiality sa mga biktima sa hitabo. (SCG)