SA LINGHOD niyang edad, expose na siya sa natad sa modeling.
Apan ang pagsalmot sa Miss Pre-Teen International competition mao ang labing-una ni Jaymee Faythe Villagomeza Halasan.
Bisan og first-timer, gipamatud-an sa 15-anyos nga dalaga nga may ikabuga siya, gipildi ang ubang kandidata ug nabitbit pauli ang korona, Hunyo 30, 2019, human siya gikoronahang Miss Pre-Teen International 2019.
Gipildi niya ang laing 13 ka kandidata nga gikan sa nagkadaiyang nasud sa Asia Pacific.
Gihimo ang koronasyon sa Jalan Loyang Besar, Singapore.
Nahimugso si Faythe dinhi, apan didto siya nagdako sa Bangkok City, Thailand.
Apan bisan og nagdako gawas sa Pilipinas, padayon siya sa pagkat-on sa kultura ug tradisyon sa mga Pilipino.
Kini resulta sa paningkamot sa iyang ginikanan nga sila James Halasan ug Niña Villagomeza Halasan.
Dakong garbo nga nahimo siyang representante sa Davao, diin sa iyang national costume girampa niya ang Agila.
Tuod man, naharbat niya ang Best in National Costume award.
Sa iyang pagbisita sa SunStar Davao office, gipaambit ni Faythe ang iyang adbokasiya nga pagtabang sa mga tiguwang ug way kapuy-an.
Luyo sa maanyag nga itsura, mas nagpasulabi sa dalaga ang matinabangon ug busilak nga kasing-kasing.
“Even a small gesture as handing packed food to the homeless on the street, is already a huge step and a big thing for those who need and yearn for it,” suma sa dalaga.
Hawud sab siyang mokanta, talentong nasunod niya gikan sa mga ginikanan nga pulos singers.
Luyo sa beauty pageant, nagaapil sab sa talent shows sa Thailand si Faythe diin nadawat siya isip usa sa Vocal Star uban ang 400 ka mga kabataan sa Thailand.
Nagtungha siya sa Ekamai International School sa Bangkok diin siya aktibo sa ilang student council ug miyembro sa cheerleading team.
Ang kadaugan niya sa kompetisyon tungod sab sa mainitong suporta sa iyang ginikanan, ug team nga gilangkuban sa pageant trainer Rogil Flores sa Kagandahang Flores, designer Edwin Uy, make-up artist Shone Zendon, photographer Ross Paris, ug national director Jeffrey Benitez.