MOSUGOT ta o dili, kining sugal wa gyud na masubay sa pagtulon-an sa Ginoo. Katingad-an kaayo nga giila ang Pilipinas nga bugtong Kristiyanos nga nasod sa Asya apan naghitak ang pasugalan.
Unsaon pagkahunong sa sugal nga mismo ang gobiyerno maoy nagpasiugda, gamit ang pangalan nga “charity” nga mas lapad pa diay ang operasiyon.
Unya, wa sab magpaiwit ang simbahan, modawat sab og hinabang gikan sa kita sa sugal. Pastilan!
Tinuod, daghan ang natabangan sa Philippine Charity Sweepstakes Office apan daghan sab nga mga tawo ang “nabuang” ug pusta.
Ang uban giseguro ang pusta kay sa pagpalit og bugas, nangindahay nga mahimong milyonaryo. Tinapulan nga estelo ba. Nagdamgo kanunay!
Sukad gipahunong ni Presidenti Duterte ang operasiyon sa PCSO duna nay kapin sa 20,000 ka mga lotto outlet sa tibuok nasod ang nasirado.
Hangtod karon, hilom pa kaayo ang simbahan. Unta moabiba sila.
Gipasikad ni Duterte ang kamandoan nunot sa “naghinobra” ug lapad nga pangurakot sa maong ahensiya. Tiaw mo, sukad niadtong 1994 hangtod sa 2016 napakyas ang PSCO pag-remit og P8.4 bilyones ngadto sa panudlanan sa gobiyerno.
Asa man mipaingon kining P8.4 bilyones?
Dili ta mosugot nga walay manubag anang pagkawala sa bilyones ka pesos nga kita sa PSCO. Dugay na kining kahiwian apan wa aksiyoni sa miaging mga administrasiyon. Ngano kaha?
Alang sa mga “tinuod” nga Kristiyanos makatarunganon ug angay lang kining gihimo ni Duterte. Unta, i-abolish nalang gyud sa hingpit kining PCSO ug uban pang matag sa sugal nga gitugtan sa gobiyerno. Unya, ipadayon sab nato paggukod ang mga illegal nga pasugalan.
Kining sugal gud, gawas nga maka-adik ni siya, nagkadaiyang problema usab ang namugna gumikan niini. Mangutana mo? Kon duna moy paryenti o silingan nga sugarol, susiha lang unsang matang sa kahimtang ang ilang panimay.
Kon tarungon lang pag-budget ug paggasto ang buhis nga natigum sa gobiyerno, dili na ta magkinahanglan pa og PSCO nga moayoda sa mga panginahanglan sa katawhan.
Busa, suportahan nato kining lakang ni Duterte pagpahunong sa operasiyon sa PCSO aron matumbok kining mga kurakot sa gobiyerno ug dili ka na manugal. Nakasabot!