DUL-AN dos mil ka mga pasugalan nga dunay kalambigitan sa Philipphine Charity Sweepstakes Office (PCSO) sa Northern Mindanao ang napasira na human gimando ni Presidente Rodrigo Duterte.
Ang Police Regional Office (PRO)-Northern Mindanao, sa pagpangulo ni Police Brigadier General Rafael Santiago Jr., dayon usab nimando nga pasirad-an ang tanan nga mga lotto outlet sa tibuok rehiyon.
Adlaw’ng Sabado, Hulyo 27, gisugdan ang pagpasirado ug sa maong gidaghanon moabot na ngadto sa 1,386 ka mga small town lottery (STL) ang napasirado, 208 ka lotto outlet, ug 306 ka Peryahan ng Bayan.
Sa STL lamang, adunay napasirado sa Cagayan de Oro City Police Office (Cocpo) nga 191; Bukidnon Provincial Police Office (PPO), 603; Lanao del Norte Police Office, 105; Iligan City Police Office, 249; Misamis Oriental Provincial Police Office (MisOr PPO), 235; Misamis Occidental Provincial Police Office (MisOcc PPO), 3; ug wala pay napasirado sa Camiguin PPO.
Samtang sa mga lotto outlets, ang Cocpo adunay 46; Bukidnon PPO, 52; LDN PPO, 14; ICPO, 19; MisOr PPO, 29; MisOcc, 48; ug wala sa Camiguin PPO.
Samtang ang Cocpo, 73; Buk PPO, 1; LDN PPO, 0; ICPO, 0; MisOr PPO, 232; MisOcc PPO, 48; ug Cam PPO, 0.
Kini nga pagpasirado produkto sa 583 ka mga operation nga gipahigayon sa kapolisan.
Gipasabot sab ni Police Lieutenant Colonel Mardy Hortillosa, tigpamaba sa PRO-10, nga walay narecord sa Camiguin tungod kay walay PCSO gaming scheme sa nasangpit nga probinsya.
Ubay-ubay pa ang wala napasirad-an hinungdan magpadayon ang monitoring ug pagsuroy sa kapolisan sa tibouk rehiyon.
“We will make sure that we will close all those gambling outlets allowed by PCSO to comply the directive of the President” matud ni Santiago Jr.
Giawhag sab niini ang katawhan nga ireport kanila kung aduna pay nagpadayon sa operasyon.
Kahinumduman nga gimando ni Duterte ang pagpahunong sa tanang mga “gaming activity” sa PCSO tungod sa giingong “massive corruption”.