NAGTINGKAGOL sa prisuhan ang usa ka babaye human nakuhaan og gituohang shabu niadtong Martes mga alas 7:45 sa gabii sa Tiano-Luna St., ning siyudad sa Cagayan de Oro.

Nakuha gikan sa kamot ni Noraya de Ocampo-Mokawi alyas Bebe Muslim, 41, minyo, taga Phase 2, Gusa ning siyudad sa Cagayan de Oro ang usa ka cellophane nga gituohang sulod mao ang shabu.

Si PO3 Fred Yasay sa Police Station 5 (PS5) sa Macabalan nga nahinabi sa Sun.Star Superbalita nga taud-taud na nga gipamatikdan si Mokawi.

Tuod man dili kini sakop sa ilang area apan base sa report nga namaligya ang biktima og ginadiling druga sanga batan-on sa Macabalan hinungdan nga sila naalarma kalabot niini.

Usa sa ilang decoy ang nakapalit niadtong cellophane nga adunay sulod nga shabu nga mobalor og P300.00 hinungdan gihimo dayon ang pagsikop niini.

Midumili pa si Mokawi ug nihimakak sa maong alegasyon ug aduna pay resistance nga nahitabo.

Matud ni Yasay nga pakyas lamang dihang wala nakuha ang bag niini nga posibleng gisudlan sa mark money tungod kay adunay kauban niini niadtong higayona nga gituohang gipasahan sa maong bag.

Nakuha lamang gyod gikan niini ang gituohang shabu nga anaa cellophane nga gibaligya niini sa ilang kaubang polis nga nagpailang kostumer.

Gibalhog ning panahona si Mokawi sa Maharlika Detention Cell, samtang gipadala na sa PNP-Crime Lab ang nakuhang illegal nga druga niini alang sa masusing eksamin. (SVB)