MGA balay ug tindahan nga ning-abot na sa karsada nga iya sa gobyerno, mas maayo nga mopasibog na karon sa ilang estruktura.
Kini ilabi na diha sa mga nasakop sa Barangay Poblacion, Dumlog ug Tabunok, sa Siyudad sa Talisay kay nakita sa pasiuna nga pagsusi sa kagamhanan sa Talisay City, adunay mga balay ug tindahan nga nakalapasa na sa pampubliko nga dalan.
Usa sa gitahasan sa pagpakig-alayon sa mga barangay ang City of Talisay- Traffic Operations Development Authority (CT-TODA).
Nakig-alayon na niadtong Martes, Hulyo 30, ang pangulo sa CT-TODA, Jonathan Tumulak, alang sa pagpakigtagbo sa mga barangay opisyal sa unang tulo ka mga barangay.
Ang Department of Interior and Local Government (DILG) nihatag og 60 ka adlaw sa mga local government unit (LGU) paghawan sa mga nasudnong karsada gikan sa mga nakababag.
Ang di makatuman nga local chief executive pasakaan og kaso.
Mando kini ni Presidente Rodrigo Duterte nga iyang giluwatan atol sa iyang State of the Nation Address (SONA).
Gitug-an ni Mayor Gerald Anthony Gullas nga una na nga gilimpyo ang mga national highway pinaagi sa rstrikto nga pagpatuman sa ‘no parking’ ug ‘clamping ordinance’.
Gasugod kini niadtong nipadangat si Duterte sa iyang Sona sa Hulyo 22.
Gimanduan ni Duterte ang mga pangulo sa lokal nga kagamhanan nga bawion ang mga dalan nga iya sa gobyerno nga gigamit na sa mga pribadong indibidwal.
Kini isip tubag sa nagkagrabe nga problema sa trapiko dinhi sa nasod.
Niadtong Lunes, Hulyo 29, nipagawas na og memorandum ang DILG kalabot sa maong mando.
Ang gihatag nga tagal 45 ra unta ka adlaw, apan gilugwayan kini sa DILG ngadto sa 60 ka adlaw tungod sa hangyo labing lisod kining ipatuman sa labing mubo nga panahon.
“Ni-coordinate ta sa mga barangay officials kay naay target nga mga barangay, ang Poblacion Dumlog ug Tabunok. Hingusgan nato na. Target namo nga pakigkitaan ang council kay nakita naa gyud sidewalk encroachment, naa gyud pag-encroach sa mga vendors ug residential house. Hinungdan naka-cause na og traffic, kay ang mga tawo imbes nga sa sidewalk moagi, diha na sa dalan,” pagpasabot ni Tumulak sa Superbalita Cebu.
“Naghinay-hinay naman gyud mi implement sa mga sugo niya (Pres. Duterte) especially sa ease of doing business. Second tarungon na gyud ang traffic plan sa Talisay. Timing sad kaayo nga during sa day sa Sona, gi-implement na sad sa CT-TODA ang clamping ug illegal parking in national highway. I told Joy (Tumulak) unahon ang national highway aron kon matarong na, isunod na dayon ang barangay roads,” pasabot usab ni Gullas.
Dugang ni Gullas nga nipa-assess na siya kon asa ni nga mga lugar nga iya sa gobyerno nga gigamit sa indibidwal ug ang kalabot sa five-meter easement.
Sa five-meter easement, ang mga estruktura tukuron kinahanglan di molapas sa mga lima ka metros gikan sa karsada.
Usa sa mga hugot nga mopatuman niini nga buhatan mao ang mga LGU, labina ang Office of the Building Official (OBO).
Gawas ning paghawan sa mga karsada, unang giestrikto pagpatuman sa Dakbayan ang mga lagda sa trapiko, labina kay usa kini sa mga dapit nga grabe og suliran sa kahuot sa mga sakyanan nga nasinati kada adlaw.