PATAY na dihang nakaplagan ang usa ka ulitawo human gituohang naghikog kagahapon mga alas 4:00 sa kadlawon sa Purok-2, Barangay Amoros siyudad sa El Salvador, Misamis Oriental.

Si PO1 Dandie Eslapor sa El Salvador Police Station niila sa biktima nga mao si Eric Jacalan-Jaraula, 35, kinsa naabtan sa kapolisan nga nagdiwal na ang dila ug nanglagom na.

Atol sa gihimong pakighinabi sa Sun.Star Superbalita ngadto kang Eslapor kinsa usa sa miresponde sa dapit nasayran nga gihikot sa biktima ang habol sa grills sa bintana ug sa iyang liog.

Uwahing namatikdan ang ulitawo mga alas 12:00 sa gabii nga nagpatukar og mga kanta ug nag-inom duol sa mini bar sulod sa panimalay.

Namatikdan nga naghikog ang biktima dihang gipukaw kini sa iyang duha ka mga pag-umangkon mga alas 4:00 sa kadlawon apan nakurat pag-ayo dihang nagdiwal na nga dila niini.

Gituohang problema sa gugma ang hinungdan sa paghikog ni Jaraula labina nga bag-ohay lang kining gibulagan sa silingan nga uyab niini.

Nakita tupad sa biktima ang usa ka suicidal note nga gipahinungod sa iyang pamilya ug ang unod sa sulat mao kini: "Ma pasayloa ko nga ako ning gibuhat, dili lang naku makaya nga nagkabulag mi ni Inday Marilou, palihog ko sa pagpabisita niya nako para mahilom ang akong kalag, para sa tanan pasayloa ko. I love you all."

Samtang dunay ikaduha nga sulat alang sa iyang igsuon nga anaa gawas sa nasud diin ang unod niini nagpasabot sa pagmahay nga wala gipalitan og motorsiklo nga dugay na nga gihangyo.

Matud ni Eslapor nga nakapetsa ang sulat niadto pang Pebrero 19 ning tuig sa alas 3:00 sa kadlawon hinungdan nga gituohang sa kapolisan nga taud-taud na nga giplano sa ulitawo ang paghikog.

Nasayran nga kanhi gipa-rehab ang biktima niadtong tuig 2006 tungod kay naapektuhan og druga apan naulian ra usab.

Kanunay nga namatikdan kining magsige og hinuktok.

Walay nakitang foulplay sa kamatayon sa biktima dihang giimbestigahan sa sakop sa Scene of Crimes Operatives (Soco).