BISAN niadtong linghod pa ang akong panabot nabantayan ko ang kalahian ni Papa Peping komparar sa ubang mga bana ug amahan.May nakit-an kong kakulang sa iyang paningkamot aron makakaon o masuportahan ang panginahanglan namong lima niya ka mga anak.Gani si Mama Emil pa ang nakita kong mikamas ug mikayod aron mi mabuhi.Usahay mosulod sa akong hunahuna nga kon kamao pa unta si Papa nga managat, magdaro ug mamanday sama sa ubang amahan, unya abagan sa kakugihan ni Mama, tingali dili unta kami ingon ani kalisod. Apan matod pa sa mga nasuheto sa kinabuhi nilang Papa kaniadto, nga nagsalig lang kuno kini sa iyang ginikanan sanglit aduna silay ikasarang, maong nagdako siya nga walay hanaw sa mga trabahuon nga pakusog.
Apan lagi kay di man puydeng mapanunod sa mga anak ang palad sa ginikanan, maong nahilinya si Papa sa mga uyamot.Pero sa akong tan-aw dili gyud unta mi malamoy sa gahong sa kalisdanan kon daghan pa untang nakat-unang trabaho si Papa. Gani dili man gyud kini motabang o bisan gani sa paghikap sa mga lukay sa nipa nga himuonong pawod ni Mama kansang halin maoy kuhaan namog panggasto matag adlaw. Kami pa man ganing mga anak ang kamaong moayuda kang Mama sa panginabuhi sama sa pagpangahoy nga among ibaligya ngadto sa mga karenderiya sa Piyer 3.
Usa pa gyud sa akong nakita nga morag dili hustong pamaagi ni Papa mao kanang palabihon niya nga maka-indono og kuwarta sa kolekta atol sa misa bisan wala na mi magasto.
“Ato usang gamiton ang nahibilin mong kuwarta kay akong idugang aron makapalit tag bugas,” hangyo ni Mama usa niana ka Dominggo.
“Unya unsa na man lay ihulog ko sa sibot? matod ni Papa.
Bisan sa maayong mga hiyas nga nahuptan ni Papa sama sa pagka Diyosnon, dili moinom. dili manigarilyo ug dili himalikas, apan wala gyud kini makakubit sa akong buot aron idolohon ko siya sama sa gibuhat sa ubang mga anak ngadto sa ilang amahan.Usahay siya pa gani ang han-ukan ko sa pagbasol, nganong wala mi makahuman sa pagtuon kaming tulo ka mga anak niyang lalake. Ug ang duha namo ka mga magulang nga babaye nakagraduate tinuod sa kolehiyo apan sa kaugalingon nilang paningkamot.
Sa akong pangagpas usa ka paglikay sa iyang obligasyon sa pamilya kanang kanunay niyang pag-adto-adto sa simbahan labi na sa mga adlaw nga pistang iglilihi, sama sa Pasko, Bag-ong Tuig ug sa Semana Santa.
Enero 18 ,2011.Sa ‘homily’ ni Padre Branditt alang sa lubong ni Papa.
“Dili hitupngan ang gasa nga gihatag sa Diyos ngadto kang Brod Peping.”pangabli sa pari.”Dili lalim ang pagbinut-an sulod sa otsienta ka tuig. Sama siya kang Maria nga diha lang sa tiilan ni Jesus ug namati Kaniya. Ug sa dihang mireklamo si Marta kabahin sa nahauna miingon si Jesus nga nakapili kini sa labing maayo.Si Peping usab wala niya himoang taming ang kawad-on aron dili makapangalagad.Ug wala sab niya igsapayan ang kapobrehon aron dili makasimba.’
Daw tamparos kanako ang mga pulong sa pari.Mas nakita pa diay sa mga tawo nga dili miyembro sa among pamilya ang mga hiyas ni Papa komparar kanamo nga mao lay nabantayan ang iyang kakulang. Ug dungan sa pagdagayday sa akong mga luha mibarog ang bantayog sa pagdayeg ko kaniya.
(KATAPUSAN)