KARON nga gipakatap na ang daghang sakop sa special force sa kapulisan sa Negros Oriental sa tuyo aron mahunong na ang sunod sunod nga pagpamatay.
Para nako angayan lang kay ordinaryo na lang kaayo ang pinatyanay nga ang nahimong biktima dili ordinaryong mga tawo.
Napatay ang upat ka mga sakop sa kapulisan dihang giambusahan sa mga sakop sa New People’s Army (NPA) didto sa lungsod sa Ayungon.
Human sa pag-ambush namatay si Sunny Caldera, ang kapitan sa Barangay Mabato, giingong dunay kalambigitan sa pag-ambush sa kapulisan.
Napatay sab si Anthony Trinidad, usa ka human rights lawyer ug gipatay sab ang lider sa farmers association.
Gipatay sab ang principal sa eskuwelahan kauban sa iyang igsoon sud sa ilang balay sa armadong mga tawo.
Kon kini sila napatay, unsa ka luwas ang kinabuhi sa mga yanong sibilyan karon nga anaa na ang pasensya sa daghang kapulisan?
Dunay mga pangutana nga mitumaw karon: Di ba kaha nga ang pagpamatay gumikan sa away sa NPA ug Philippine National Police (PNP)? Dilikado ang sitwasyon karon sa lugar kay mora man ug nagbinawsanay nalang ang duha ka grupo.
Tiaw moy, sud sa 24 oras pito ka tawo ang namatay ug samtang sa lima ka adlaw dunay 15 ang nangamatay.
Sa pagkakaron, moabot na sa 17 ka mga tawo ang ang namatay. Kini mahimo kon ipatuman ang peace talks tali sa duha ka grupo.
Kay kon dili makab-ot ang kalinaw makapaabot kita nga daghang sibilyan ang madamay ug mangamatay.
Sa siyudad sa Talisay
Dakong responsibilidad karon sa kapulisan sa maong siyudad ang pagsanta sa brutal nga pamaagi sa pagpatay.
Sa sunodsunod nga pagpatay nakit-an ang duha ka kaso sa brutal nga pagpatay. Gibitay sa taytayan sa Mananga human gi-salvage ug gipusil ang notadong tulisan.
Gisundan sa pagpatay sa usa ka tawo nga nalambigit sa kalihukan sa ilegal nga drugas. Ang suspek gigaid sa poste, gibaatan ang baba ug gitaptapan ang nawong.
Sa mga kaso nga ingon niini di malikayan nga dudahan ang atong kapulisan. Apan dugay na kini gipanghimakak sa ilang kadagkoan-an.
Email: efrenlonzon71@gmail.com Text:09235562777