SA IYANG SONA sa miaging Lunes, gipahibawo ni Pamuno Rodrigo Roa Duterte nga agnihon niya ang kongreso nga ibalik ang gikahadlukang death penalty.
Iapil na ang plunder ug drugas sa silot sa kamatayon. Kusog ning makabunlot ngadto sa ubos gidaghanon sa krimen nalambigit niini.
Kining lindog uyon nga mabalik ang death penalty. Kining naghitak karon nga panulis sa kaban sa nasod, negusyo sa drugas ug pagpanlugos-patay nga daw di na mabangbang.
Ang makapitol sa mga kurakot, durugista, drug pushing ug trading, panglugos maora gyud ang kahadlok sa silot sa kamatayon nga ipahamtang.
Nahibung ta nganong way pagtang-on ang shabu. Morag tubod nga way pagkahubas. Nagpasabot nga maorag naa ubos sa atong ilong nga wa diparahi.
Di ko motuo nga mga pulpol ning atong kapulisan. Labing seguro may mga protector diha sa atong awtoridad ang mga laboratory sa shabu dinhi sa ato.
Kon retrospective pa kini ang atong mga bag-ong balaod (retroactive) mosugod nag butok-butok sa kakulba ang dughan nilang Jinggoy Estrada ug Juan Ponce Enrile.
Ang laing giakusahag plunder nakaipsot nga wa dahuma ug gani napili nga senador sa Pilipinas. Ka way buot ang ningpili kaniya. Husto sila kang Estrada ug Enrile.
Nabakwi (repealed) ang death penalty panahon ni Pamuno Arroyo pag-ulo-ulo sa Simbahan nga anti-death penalty. Humot pa sa agwa si Gloria niadto sa kaparian.
Ang nalipay pag-ayo sa pagbakwi sa death penalty mao kadtong killer-rapists sa Chiong sisters nga diha na sa death row. Nakaeskapo sila tungod ni Gloria.
Suwerte ang akong silingan nga si Allan Cano kauban sa killer-rapists. Nadato pa kay sa sud sa Bilibid nagnegusyog shabu. Ang manuaw nga taga amo dakong kuwarta ang madawat. Moingon pa, aron madato papriso mo!