HINDANG, Leyte - Usa ang patay, usa ang samdan ug laing usa nadakpan sa managlahi nga anti illegal drugs operations sa Eastern Visayas, Miyekules, Hulyo 24, 2019.
Unang operasyon gilusad sa Philippine Drug Enforcement Agency (PDEA) 8 ni Agent Cleveland Villamor, Leyte Provincial Drug Enforcement Group ni Police Major Maturino Diaz, Regional Drug Enforcement Group ni Police Lieutenant Harry Sucayre ug Philippine Army Capt. Kervin Jay Latoza didto sa Barangay Tagbibi, Hindang Leyte.
Tuyo sa operasyon sila si Joel Jundis, 41, taga Hilongos, Leyte ug ang 16 anyos nga gitago sa ngan nga Juday, taga Bato, Leyte.
Matod sa awtoridad, level 2 high value target sa Hilongos Police si Jundis samtang naa sab sa watchlist sa Hindang Police si Juday.
Taudtaud gipanid-an sa mga awtoridad ang mga suspek sa ilegal nga kalihukan.
Alas 4:10 sa hapon sa Miyerkules, usa ka poseur buyer sa PDEA ang nipalit kang Joel.
Nitunol kini og usa ka pakete nga shabu baylo sa marked money nga P500.
Matod sa report sa kapulisan, nakabantay ang suspek nga niabot na ang mga operatiba busa nibunot kini sa iyang armas ug namusil sa makatulo sa mga operatiba.
Nibawos ang mga operatiba agig panalipod hinungdan nga napatay diha-diha si Jundis.
Sa pagsusi sa taga Scene of the Crime Operatives, nakuha sa crime scene ang unom ka dagkong pakete sa gituhoang shabu nga mobalor og P200,000; marked money nga P500; kalibre .38 nga revolver nga dunay usa ka bala ug laing basiyo sa kalibre .45 nga pistola.
Si Juday gipasakaan na og kaso sa Hindang Police Station ug gitugyan ngadto sa Department of Social Welfare and Development (DSWD).
Sa samang adlaw, sa Maasin City sa Southern Leyte, napusilan usab sa mga awtoridad ang usa ka drug personality.
Ang buy-bust operation gipahigayon sa Barangay Combado, Maasin City, alas 7:20 sa gabie. (JKDP)