INAHAN nga giingong nilumos sa iyang 11 ka buwan nga anak ug gituohang nakasinati og post partum depression anaa na sa psychiatric ward sa Vicente Sotto Memorial Medical Center (VSMMC).
Matod pa ni Police Chief Master Sergeant Ruth Bongo sa Police station 3 sa Cebu City Police Office (CCPO) nga gibalhin ngadto sa ospital ang inahan kay di mamahimo nga magpabilin sa ilang presinto kay manapat sa mga kauban niini sa sulod.
Nakapakuyaw kini sa iyang kahimtang sulod sa bilanggoan nga dunay mga kaubang piniriso.
“Actually sa level sa police, dili man gud mi doctor nga makahibaw sa iyang state of mind. Ang doctor maoy makasulti ana. As of now, wala may medical result pa gikan sa doctor diri namo. So, amo gyud ni (parricide) nga gi-file. We consider her as normal, normal og panghuna-huna, then ang amoa i-recommend ra ni namo sa fiscal kining parricide case. Then, it’s up to the fiscal,” matod pa ni Bongo.
Niadtong Biyernes sa gabii, Hulyo 26, napalgan sa amahan sa suspek ang iyang apo nga nagtuwad sa balde nga puno og tubig sulod sa banyo.
Iyang gibiyaan ang iyang anak ug apo sud sa kwarto sa dormitory sa downtown nga ilang giabangan kay duna siyay gipalit sa tindahan.
Sa iyang pagbalik, wa na niya makita ang iyang apo, ang iya na lang anak.
Didto na niya kini maabti sa sulod sa banyo.
Gidali pa pagdala ang masuso sa tambalanan apan gideklarar nga dead on arrival.
Lunes,Hulyo 29, giduso na nila ngadto sa Cebu City Prosecutor’s Office ang parricide case batok sa inahan.
“Maski ibutang ta nga magdepende sa medical record sa suspek, depende ra gihapon na sa presecution kon unsa ilang desisyon. Basta sa side sa mga police kay naa man gyuy namatay, mo-recommend gyud mi, apan magdepende gihapon sa fiscal kon ipasaka ba gyud nila sa korte, “ dugang pa niya.
Ang post partum depression sagad masinati sa mga babaye human sa pagpanganak.
Mga timailhan niini naglakip sa depressed mood o severe mood swings, grabeng paghilak, kalisod nga makig-uban sa iyang masusong anak, di na makighugoyhugoy sa pamilya ug kahigalaan, pagkawala sa gana sa pagkaon, kalisod sa pagkatulog o grabeng pagkatulog, kanunay luya o way kusog, way gana sa paglihok nga naandan untang gibuhat, daling masuko, kahadlok nga di mamahimong maayong inahan, pagkawala sa paglaum, kakuwang sa paghigugma sa kaugalingon, di mahimutang, kauwaw, panic attacks, maghuna-huna sa pagpasakit sa kaugalingon o maghikog. (Myla Tabio CNU Comm Intern)