GIPUSIL-patay ang usa ka gitumbok nga durugista sa Sitio Bagumbayan 1, Barangay Maribago, dakbayan sa Lapu-Lapu, mga alas 7 sa milabayng Lunes sa gabii.
Ang biktima nailhang si Edwin Pinote Melicor, 50-anyos, molopyo sa Sitio Pagutlan sa maong barangay.
Sa imbestigasyon sa Mactan Police Station sa Lapu-Lapu City Police Office LCPO, nasuta nga ang biktima gikan nagpalit og sud-an sakay sa iyang tricycle dihang gipusil sa wala mailhing mamumuno.
Matod ni Police Major Miguel Andeza, hepe sa Mactan Police Station, nakaangkon og samad ang biktima sa buko-buko, ulo ug ubang bahin sa lawas gikan sa gituohang kalibre 9mm nga pistola.
Matod pa kapin sa 10 ka mga buto-buto sa armas de fuego ang ilang nadungog atol sa maong hitabo.
“Gisundan gyud ni siya sa gunman ambot nganong layo siya’g gipalitan og sud-an nga layo man ila sa crime scene” matod ni Andeza.
Sa inisyal nga pakisusi sa kapulisan posibleng may kalambigitan sa ginadiling drugas ang motibo sa pagpamusil.
Kini human giingong kaduha na nga higayon napasakaan og kasong paghupot og ginadiling drugas ang biktima.
Niadtong 2017 unang nasikop sa mga sakop sa City Intelligence Branch CIB si Melicor ug ikaduha niadtong 2018 sa mga kapulisan sa Mactan Police Station. Hinuon nakapiyansa kini sa mga kaso.
Dako ang pagtuo ni Andeza nga posibleng namaligya na ug ginadiling drugas ang biktima gawas sa iyang pagka tricycle driver. Wa usab isalikway ang pagduda nga adunay kaabot ang biktima sa dapit nahitaboan o ba kaha naghatod og ilegal nga drugas.
“Way lain, drugs jud atong anggulo kay basin namaligya na ni siya wala lang nato ma detect, posible ni siyang nakadiskwido unya gahi-gahi na wala na mohatag mao na ni siguro basig gikuan na ni sa iyang kuan (amo),” matod ni Andeza. (GCM)