SIYAM ka mga tawo ang nangasikop sa dihang gironda ang usa ka drug den sa barangay Mambaling, siyudad sa Sugbo sa mga operatiba sa Philippine Drug Enforcement Agency (PDEA) 7 inabagan sa Mambaling Police Station mga ala una ang takna sa hapon kagahapon.
Lakip sa nasikop ang drug den maintainer nga si Harol Joseph Fernando ug ang mga naatlan nga nanuyop sa sulod nga sila si Zesario Navaja II, Jesse Romante, William Obligado, Clint Davis, Lucresio Fajardo Jr, Marcial Casilac, Ruben Carambis ug Arielito Bicar.
Nakuha gikan kanila ang 27 ka pakete sa gituohang shabu nga motimbang sa 25 gramos diin mobalor ang tanan sa P102,000.
Lakip sa mga nakuha sa PDEA ug sa kapulisan ang mga gamit sa pagsuyop sa shabu.
Kapin sa usa ka semana nga gi-monitor sa PDEA -7 ang maong drug den diin moabot sa 15 gramos ang mabaligya ni Fernando.
Matod ni Leia Alcantara, information officer sa PDEA-7, nga kasagaran sa mga mogamit og shabu sa drug den mao ang mga construction workers, habal-habal ug mga pedicab drivers gikan sa mga silingang barangay.
Ang impormasyon nadawat nila gikan sa mga nagpakabana nga molupyo sa lugar. Kolektahan usab sa drug den maintainer og tag P30 ang matag usa.
Samtang alas 10:50 sa gabii niadtong Lunes, nasikop usab sa Carbon police station ang usa ka menor de edad ug ang iyang 29 anyos nga kauban atol sa buy bust operation niini sa Sitio Pig Vendor, Barangay Ermita, siyudad sa Sugbo.
Ang batan-on lumad nga taga Zamboanga City apan kasamtangan nga nag puyo sa sitio Nava, Mambaling.
Ang kauban niini giila nga si Shinovu Nogi, 29, taga barangay Tabunok, dakbayan sa Talisay.
Target sa kapulisan mao ang menor de edad human makakuhag impormasyon nga namaligya kini’g ilegal nga drugas.
Nakuha gikan kanila ang mga pinakete sa ilegal nga drugas nga motimbang og 5.36 ka gramo nga mobalor og P36,448. (AYB)