2 mil ka mga BEI's bansayon sa Comelec

SUGDAN na sa mga personahe sa Commission on Elections (Comelec) sa Davao del Sur ang pagbansay sa kapin 2 mil ka mga Board of Election Inspectors (BEI's) sunod semana.

Gipabuhagay ni Lawyer Maria Febes Barlaan, nga andam na ang ilang buhatan sa pagbansay sa mga BEIs unsaon paggamit ang Precinct Count Optical Scan (PCOS) machine.

Apan usa ka BEI nga si Loida Remando, magtutudlo sa Don Mariano Elementary School, nagkanayon nga nagsagol ang gibating kakulba ug paghinam-hinam sa taliabot nga piniliay sanglit kapin duha ka bulan na lang ang nahibilin apan wa pa silay klarong pagtuon sa mga makina, nakuyawan siya nga mapalpak sila.

Alang nila, dakong hagit nga mapatuman ang kahapsay sa eleksiyon ilabina kay computer na ang gamit niini.

Hinuon, matud ni Barlaan nga sugdan na sunod semana hangtud Marso 27 ang training alang sa mga BEIs lukop lalawigan.

Gipadayag sab sa Comelec nga niadto pang adlaw'ng Dominggo nangabot sa ilang buhatan ang 60 ka mga PCOS machine ug mga training manual nga gamiton sa siyudad ug 14 ka munisipyo sa Davao del Sur.

Nihangyo sab karon ang mga BEIs nga mahatagan sila og dugang proteksiyon atol sa ilang pagbantay unya sa matag presinto ilabi na nga gikatahong nagkainit ang sitwasyon sa politika dinhi sa lalawigan nunot sa kanunayng pagpanghasi sa pipila ka dagkong politiko ngadto sa ilang mga kalaban sa politika.

Di sab ikalimod nga usa ka politiko ang kanunay nga manghagit og sinumbagay, pinusilay ug uban pang matang sa pagpanghasi mao nga gikinahanglan karon sa lalawigan ang dugang pagtan-aw sa kapulisan ug kasundalohan.

Hinuon, gipasalig sa Comelec nga mag-workshop sab ang mga BEI kon unsay angay buhaton, makasulay sila sa paggamit sa mga PCOS aron mabansay pag-ayo.

Adunay 2,130 ka mga BEI dinhi sa probinsiya ang gitakdang mo-serbisyo panahon sa eleksiyon. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph