ANG 96-anyos nga inahan sa Board of Director (BoD) sa Davao del Sur Electric Cooperative (Dasureco) namatay human mapaig dihang nasunog ang ilang panimalay, alas 9:00 sa gabii, Martes.
Nasaksihan sa Sun.Star Superbalita, dihang gikuha sa mga sakop sa Bureau of Fire Protection (BFP) ang patay'ng lawas ni Marcela Granada, inahan ni Wilfredo Granada, aron ihatod sa punerarya.
Ang insidente nahitabo samtang gisaulog sa BFP ang Fire Prevention Month nga nagbaton sa temang "Sustaining Fire Prevention through Active Community Participation."
Nilutaw sa imbestigasyon sa BFP nga usa ka gidagkutang kandila ang hinungdan sa sunog kay wa kini mabantayi didto sa ilang balay sa Purok Maligaya, Barangay Poblacion Uno, sakop sa lungsod sa Bansalan, Davao del Sur.
Mga alas 6 pa sa gabii, napawong ang kuryente sanglit gipatuman na sab sa Dasureco ang 5 ka oras nga rotating brown-out sa tibuok lalawigan mao nga nag-agwanta og suga sa kandila ang tigulang.
Si Inspector Reyniel Raotraot, deputy chief of police, sa lugar nagkanayon nga nagsugod ang kalayo gikan sa lawak sa biktima mao nga nagtuo silang natumba o naupos ug wa mabantayi nga kandila.
Way nasalbar sa ilang mga gamit ang pamilya Granada tungod sa kapaspas sa pagkanit sa kalayo.
Sukad Pebrero 23, nasinati na sa probinsiya ang inadlaw nga brown-out human pugsanong gimando sa National Grid Corporation of the Philippines (NGCP), tungod sa nasinating krisis sa kuryente.
Nagpahimangno karon ang mga otoridad ngadto sa katawhan nga kon mogamit og kandila ampingan gyud kini sanglit kini maoy nag-unang hinungdan sa sunog panahon sa brown-out.
Hangtud karon wa gihapon makasabot ang katawhan kung nganong padayon ang taas nga brown-out dinhi sa Mindanao bisan pa man og miandar na ang 35 megawatt nga Iligan Diesel Power Plant (IDPP) niadtong Lunes gikan sa duha ka semana niining pagkapawong.
Nisaad sab ang 4 ka mga dagkong kompanya dinhi sa lalawigan nga mogamit sila og generator aron makadaginot ang Dasureco og 7 MW, aron sab makuhaan ang oras sa brown-out apan daw wa gihapon kini epekto.
Daghan sab ang napungot sanglit ipatuman gihapon sa Dasureco ang brown-out bisan panahon sa kagabhion diin delikado kaayo alang sa kadaghanan. (Orlando B. Dinoy)