GIKLARONG suspendido na ug dili na modawat og kliyente ang buhatan sa Misamis Oriental Cares System nga programang panglawas ug pangkatilingbanon ni Misamis Oriental Governor Yevgeny “Bambi” Emano sukad paglingkod niini isip gobernador unom na ka tuig ang nilabay. Kini ang kumpirmasyon ni Emano sa interbyu sa SunStar Superbalita ug miingon nga gisuspenso kini gumikan kay ilang gipaabot unsay papel niini sa bag-ong panglawas nga programa ni Presidente Rodrigo Duterte nga mao ang Universal Health Care (UHC) Law. “Yeah, Misor Cares is suspended, mag agad pami sa iyang rule sa universal health care. Ang province wala na gadawat ug kliyente. Sa mga namatyan naa man tay local government unit, naa may mga mayor, naa man kadtong nagsaway og MisOr Kill kadto sa ilang doulan,” matud ni Emano. Pasabot sab sa gobernador nga hatagan lang og igong higayon ang programa nga dili magkapareha sa UHC Law. “Sige lang, give us time nga dili ba nato ma duplicate ang Universal Health care because I believe in the universal healthcare of President Duterte,” matud niini. Pipila sa mga Misamisnon nga nakabenipisyo niini dismayado sa pagka-suspendido niini tungod kay aminadong dako kaayo ug tabang labina sa panginahanglan sa panglawas. “Ako akong mga anak pag magsakit, maghilanat dalhon dinhi sa provincial hospital sa Balingasag inatiman mi sa mga trabahante sa MisOr Cares ug mogawas mi nga wala diha among bayaran. Karon asa mi magsige og patabang ani,” matud ni Sarah Janoplo nga taga Balingasag, Misamis Oriental. Sa iyang bahin sab ni Rick Labial, gibutyag niini nga dihang namatay iyang asawa ug ang MisOr Cares maoy nagsagot sa pagpabalsamar, lungon ug bisan sakyanan ngadto sa paglubong. “Akong asawa namatay diha sa Provincial Hospital unya kinahanglan man siya ibiyahe sa Lagonglong mao to nga niduol mi sa MisOr Cares deretso mi nahatod ug gisagot among mga panginahanglan labina kay walang wala gyod mi ato nga panahona hangtod sa pagpalubong,” matud ni Labial. Matud ni Governor Emano nga naay alternatibo nga mahimong doulan sa mga nagkinahanglan ug mao ang Provincial Social Welfare Development Office. Gipaniguro lang niini nga ang probinsya maoy pilot province o nag unang probinsya kung asa unang ipatuman ang programa ni Presidente Rodrigo Duterte nga Universal Health Care Law. “We will have to wait from the national government. But one thing is certain MisOr will be a pilot province of Universal Helth Care,” matud ni Emano. Kahinumduman moabot ngadto sa 5 milyon ka serbisyo ang natunol sa MisOr Cares sukad sa pamunoan ni Emano.