PERSONAL nga midangat sa dakbayan sa Cagayan de Oro si Senator Christopher “Bong” Go aron ayudahan ang mga nasunogang pamilya sa Sitio Mulmac, Barangay Macabalan, dakbayan sa Cagayan de Oro.
Adlaw’ng Sabado, Hulyo 27, miabot si Go sakay lamang sa motorsiklo kinsa init sab nga gitagbo sa katawhan bisan paman nga nasunogan.
Sa iyang mensahe, iyang gisulti ngadto sa nasunogan nga bitbit niya ang kantidad nga P3,000 alang sa tagsa-tagsa ka pamilya lakip na niini ang mga relief goods.
Dugang ni Go nga kadto nga ayuda temporaryo lamang hinungdan iyang gimando ngadto sa National Housing of Authority (NHA) ug local government unit sa Cagayan de Oro sa pagpangulo sa acting mayor nga si Girlie Balaba nga pangitaan og mabalhinan ug matukoran og balay ang mga nasunogan.
Mando sab niini ngadto kang kapitan Norbert Saa sa Macabalan nga dili pasagdan ang katawhan ug ihatag ilang mga panginahanglan samtang sila nagpasilong sa covered court sa Macabalan Elementary School.
Lakip sa gimandoan niini ang Tesda nga ihatag ang availability nga mga slots niadtong nagkinahanglan makatuon. Ang Department of Health (DOH) gimandoan sab nga dili pasagdan ang panglawas sa mga nasunogan.
Matud sa senador nga unta ang katawhan magmatngon diha sa ilang mga puloy-anan ug dili biyaan ang mga bata nga nag inusara sa ilang puloy-anan aron ang sunog malikayan.