GI-RESCUE sa Regulatory and Complaint Board (RCB) ang upat ka mga menor de edad human nasapon nga anaa sulod sa usa ka bar sa Barangay Carmen, dakbayan sa Cagayan de Oro.
Giingong naka-uniporme pa ang mga menor de edad nga naglingkod ug nagtambay-tambay sulod sa imnanan niadtong Hulyo 29 sa hapon.
Sa pakighinabi sa SunStar Superbalita kang Antonio Resma Jr., inspectorate team leader sa RCB, gibutyag niya nga wala nila nasapon nga nag-inom na ang mga menor de edad apan posibleng mao pa sab ang pag-abot niini hinungdan nga ila kining gi-rescue.
“Naa tay nangasapon, mga esyudyante naka-uniporme pa raba, wala hinuon pa sila nag inom pero didto nagtambay sa mahulog na lugar siya og bar kay sarisari store pero naay mga lamesa, sa pikas table ga-inom sila wala pa lugar, ato gihapon silang gi-rescue kay bawal man gyud sila sa imnanan,” matud ni Resma.
Gipasidan-an usab niini ang mga batan-on labi na mga menor de edad nga dili na mosulod sa mga imnanan.
“Ayaw namo sulay og anha pa sa mga bars kay kung masapon mo i-rescue gyud mo kay ang atong ordinansa klaro gyud na nga bawal sila sa sulod at the same time bawal gyud sila mag-order o magpalit or mag consume aning ilimnong makahubog,” dugang pa.