GIKONPIRMAR ni Presidential Spokesman Salvador Panelo niadtong Biyernes, Hulyo 26, ang pag-veto ni Presidente Rodrigo Duterte sa anti-endo (end of contract) o security of tenure bill.
Sa iyang veto message, ang pangulo nipasalig nga bisan pa sa maong veto, padayon siyang nibarog sa pagpanalipod sa katungod sa mga mamumuo sa ilang security of tenure pinaagi sa pagwagtang sa tanang matang sa “abusive employment practices.”
Ang maong balaudnon, nga magdili unta sa labor-only contracting, gisupak sa mga dagkong kahugpungan sa mga magpapatigayon nga gustong ipabilin ang ilang katungod sa labor outsourcing.
Hapit na mahimong balaod ang anti-endo bill niadtong Hulyo 27 kon wa pa ang veto. Lakip sa nisupak niini mao ang American Chamber of Commerce of the Philippines, Makati Business Club, Philippine Chamber of Commerce and Industry, European Chamber of Commerce of the Philippines ug ang Foundation for Economic Freedom.
Apan bisan ang mga pundok sa mga mamumuo wa makauyon sa maong balaudnon. Sama sa Partido Manggagawa; Alliance of General Unions, Institutions, and Labor Associations; ug ang Philippine Airlines Employees Association. Gusto nila nga idili ang fixed-term employment ug multi-layered contracting ug ipahamtang ang mas bug-at nga multa sa labor-only contracting.
Matod pa sa pangulo wa motuman ang mga magbabalaod sa ilang gikauyonan nga idili ang labor-only contracting apan kinahanglan nga tugotan ang mga magpapatigayon nga makalihok, kinahanglan nga balanse ug patas ang mga magpapatigayon ug ang mga mamumuo.
Iyang gihimong sanglitanan ang mga kawani nga tapulan, habitual absentees, way kamhoan ug way “IQ” nga modangop dayon ngadto sa Labor Arbiter sa National Labor Relations Commission kon taktakon sa ilang mga employer.
Naglaraw ang pangulo nga mosumitir og laing bill ngadto sa Kongreso nga magbalanse sa katungod sa management ug sa mga workers. Sa ato pa, di pa angay nga mawagtangan sa paglaum ang mga mamumuo. Di pa kadto mao ang katapusan sa “anti-endo” bill.
Ang contractualization sa mga trabahante usa ka wa damhang resulta sa balaod nga nag-ingon nga kon ang usa ka kawani molapas na sa unom ka buwan, automatic siyang mamahimong usa ka regular employee.
Ang gibuhat sa mga kompaniya, papirmahon ang mga kawani og kontrata nga tag-lima ka buwan ra ang ilang trabaho aron di mahimong regular employee. Ang end of contract cycle magpadayon hangtod nga wa pay balaod nga magdili niini. - edbarrita@gmail.com