Nalzaro: Balik na ang lotto

WALA abti og usa ka semana human niya gisuspenso ang mga legal numbers draws nga ubos sa Philippine Charity Sweeptakes Office (PCSO) gumikan sa naghitak nga kurapsiyon, niadtong miaging adlaw gilibkas na ni Presidente Rodrigo Duterte ang iyang kamanduan. Intonses, mobalik na ang lotto draws, ang suwertres og six digits combination. Pabilin suspensido ang operasyon sa Small Town Lottery (STL), Peryahan ng Bayan ug ang duwa pinaagi sa Keno machine.

Kay gibalik naman sa Presidente, unsa man nasulbad na ba ang kurapsiyon sa maong ahensiya nga maoy iyang girason nga iyang gisuspenso? Nabungkag na ba ang sindikato nga naa mag-operate sa sulod mismo sa sa PCSO nga dugay na kaayong nakagamot? Di ba kining maong sindikato gilangkuban mismo sa mga opisyal sa maong buhatan? Ang mga operators sa mga duwa sa lotto nga nakakuha og franchise, licenses ug permits sa PCSO dili na kaha makakuwarta nga mas dako pa kay sa gi-remit nila sa gobiyerno?

Unsa man paukyab ra to sa Presidente? O nakahuna-huna ba kaha siya nga daghan ang naapektuhan labi na kadtong nagsalig sa operasyon sa PCSO? O gumikan ba sa mga tawong masakiton nga nagsalig sa tabang sa PCSO alang sa ilang hospital ug medical needs?

Duna ba kahay naka honghong sa iyang mga suod nga higala o nakaamot sa iyang campaign funds niadtong midagan siya sa pagka-Presidente? Kon mangutana mo kon si kinsa kining mga tawo nga nagpadagan sa illegal nga sugal ubos sa PCSO, mga tawo ra man usab sa Presidente. Daghan nagduda nga ‘Davao group’ ang nagpadagan niini.

Puwede man nga ipadayon ang operasyon sa PCSO labi pa ang swertres og six digits samtang magpadayon ang imbestigasyon kay wala man kahay anomaloya ning maong mga bola. Kon naa sa STL og peryahan ng bayan ang anomaliya, dan angayan hunongon ang maong mga duha. Ug kinahanglan nga ilhon og ikiha gyud kining mga tawo nga nahilambigit sa kurapsiyon sa maong buhatan. Dili kay pasagdan lang. (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph