NASUGAMAK na sab sa laing kapildihan ang Cebu Sharks-Casino Ethyl Alcohol batok sa Makati Super Crunch, 73-67, niadtong Martes sa Maharlika Pilipinas Basketball League (MPBL) Lakan Cup Muntinlupa Sports Complex.
Ang kapildihan maoy nagpatagak sa Sharks sa 3-5 nga rekord samtang ang Super Crunch ningsaka sa 5-1 nga baraha.
Ang Sharks, nga ningkombati nga wala ang usa sa ilang labing lig-ong haligi nga si Patrick Cabahug, nalubong og 18 puntos, 45-27, sa tungatungang bahin sa 3rd quarter.
Hinayhinay nga ninglangoy ang opensa sa Sharks aron pahakan ang labaw sa Super Crunch, 61-63, sa nahabiling 1:55 minutos.
Apan human niini, nakakompleto og three-point play ang pambato sa Super Crunch nga si Jecster Apinan unya nasundan kini og three-point shot ni Joseph Sedurifa aron inaton og balik ang ilang labaw, 69-61, sa nahabiling 52 ka mga segundos. Wala na nakabawi ang Sharks hangtod na sa katapusang gutlo.
Ang Super Crunch gipangulohan ni Apinan pinaagi sa iyang 21 puntos samtang nihatag og 11 puntos si Sedurifa.
Ang Sharks gipangulohan nila ni William McAloney ug Rhaffy Octobre pinaagi sa ilang 16 puntos matag usa. (ESL)