PASTRANA, Leyte -- Suspetsadong tulisan nga naa usab sa drug watchlist sa kapulisan ning lungsod napatay human nakigpinusilay tali sa kapulisan.
Nasikop usab ang iyang kapuyo nga naa usab sa drug watchlist sa lungsod. Giila ang napatay nga si Eric Cabidog, 26,taga District 2 ning lungsod.
Base sa report sa kapulisan, usa ka pagpanulis ang nahitabo sa samang lugar atubangan sa usa ka tindahan, alas 2 sa hapon, Lunes, Hulyo 29, 2019.
Giila ang biktima nga si Ramel Candelosa.
Gihulagway ni Candelosa ngadto sa kapulisan ang pamay-ong sa suspek ug ang gisakyan niini. Dugang pagsusi sa kapulisan, nakit-an sa closed circuit television (CCTV) camera ang gisakyan ni Cabidog.
Ang kapulisan pinangulohan ni Police Captain Christopher Pangue, hepe sa Pastrana Police Station, nihimo og follow up operation.
Didto sa maong lugar ilang nakit-an ang gisakyan ni Cabidog nga nakaparada gawas sa balay niini atol sa follow up operation.
Naa sud sa ilang balay si Cabidog uban sa iyang kapuyo nga si Zania Cristy Arguelles, 40, kinsa naa usab sa drug watchlist sa kapulisan.
Nakabantay si Cabidog nga dunay mga pulis sa gawas sa ilang balay hinungdan nga nikuha kini og pistola.
Nisuway siya pagsibat sa likod agi sa likod sa balay ug sa samang higayon nakigpinusilay sa kapulisan.
Naigo si Cabidog sa nagkadaiyang parte sa lawas hinungdan sa iyang kamatayon.
Human niini, gisud sa kapulisan ang balay sa suspek diin naa sa sud ang kapuyo.
Ang kapuyo nakuhaan og tulo ka pakete sa gituhoang shabu, usa ka kalibre .357 Magnum revolder, 13 ka mga basiyo sa bala sa .357 Magnum ug tulo ka cellular phones.
Si Dr. Rolando Sulla sa Municipal Health Office niabot sa crime scene ug nideklarar sa suspek nga patay na.
Sa pagsusi sa Scene of the Crime Operatives (SOCO) sa lawas ni Cabidog, nakuha ang usa ka kalibre .45 nga pistola, mga bala ug sling bag nga dunay sud nga P39,984.
Naa na sa kustodiya sa kapulisan ang kapuyo sa suspek samtang ang mga ebidensya naa sa Crime Laboratory alang sa eksaminasyon. (JKDP)