ANG Aluporter Group, Inc. nipahigayon sa ilang grand opening niadtong Lunes, Hulyo 29, sa buntag sa Porter Marina, Barangay Calero, lungsod sa Liloan, Cebu.
Usa kini ka kompaniya nga tighimo og mga aluminum nga sakyanang pangdagat ug sa pakigtambayayong sa Suzuki Philippines.
Ang maong programa gipangulohan ni Jessica Barbier, presidente sa Aluporter.
Si Barbier nibutyag nga daghan og mga hagit ang iyang naagian sa pagtukod ning maong kompaniya, apan wala kini nakawala og kadasig kaniya sa pagpadayon niini kay ang iyang tumong mao ang paghimo og kalidad nga mga sakyanang pandagat.
Aluminum ang materyal nga gigamit sa kompaniya sa paghimo og mga sakyanang pandagat tungod kay mas lig-on kini ug molungtad og dugay komparar sa fiber made nga mga sakyanang pandagat.
Ang kantidad niini mas mahal komparar sa naandan nga presyo sa mga fiber made nga bangka tungod kay mas lig-on kini ug gamay ra nga pagmintinar ang gikinahanglan, dili sama sa uban.
“The idea is to educate the market on why aluminum would be a better investment in the long term,” dugang niya.
Molungtad kini ngadto sa 10 hangtod 20 katuig sigon pa niya.
Sa kinatibuk-an ang Aluporter nakahimo na og 15 ka mga sakyanang pandagat sukad sa pagsugod sa maong kompaniya niadtong 2015 hangtod karon.
Subay sa opisyal nga pagbukas sa maong kompaniya, nipahigayon usab sila og usa ka “Clean up Drive” diin ang tanang pwede pa ma- recycle nga basura adto ibutang sa usa ka giant killerwhale sculpture isip usa ka pahimangno alang sa katawhan sa pag-amping ug pagtipig sa kadagatan ug sa atong palibot. (Myla Tabio, CNU Comm Intern)