GIWITKAN ni Misamis Oriental Governor Yevgeny “Bambi” Emano si Sangguniang Panlalawigan Board Member Jerry Khu atol sa pagpahigayon sa pagpakayab sa nasudnong bandila adlaw’ng Lunes, Hulyo 29.
Nag-ugat kini sa isyu nga wala ma-release ang mid-year bonus, ug usa si Khu sa mikwestyon niini.
Matud ni Emano, nasabtan niya ang obligasyon ni Khu ug gihinaot niining kinasing-kasing ang pag kwestyon niini, ug dili tungod kay giingong aduna kini lending business kon asa nabaligya na sa pipila ka empleyado ilang mid-year bonus.
“I heard that in Sangguniang Panlalawigan, Jerry was trying to call on and ask for midyear. Also, I understand, Jerry, your obligation. I understand how it is and you are the opposition. The black must be white, and if we do white it must be black. I understand. I just hope really that the sincerity of asking for it is really from the heart and not, I hope, and not because some were also able to sell their salary sa imong gamay nga negosyo sa imong lending,” matud ni Emano ug miingon naglaom siya nga ang intensyon ni Khu klaro ug alang gyod sa mga empleyado.
Apan si Khu namahayag nga wala siyay lending business sama sa gipaabot ni Emano. Gibutyag niini nga iyang gikakurat ang mga pamahayag ni Emano sa kabuntagon sa flag raising nga, kadtong adlawa, nalipay ang mga empleyado sa presensya ni Miss Air Philippines Ana Monica Tan.
“Natingala ko sa iyang paglakbit sa lending business. Kami ni Governor Emano public knowledge kana nga soud kaayo kami molaag sa among balay mosangpit sa akong mama. Nasayod siya sa among panginabuhi nga pinobre. Apan natingala ako nga iyang gibahiran nga matud pa niya tungod sa bahid sa pulitika. Maayo kaayo atong kabuntagon. Nalipay kaayo ang empleyado, Lunes. Apan iyang gilakbitan ang personal nga kinabuhi. Bisan pa og tinagsaon ang mga empleyado sa kapitlyo, wala man koy nahimong negosyo dinhi sa probinsya,” sulti ni Khu.
Gi mando ni Emano si provincial jail warden Dominador Tagarda nga dakpon ug posasan ang mga loan shark sa palibot sa kapitolyo human gitouhan niining pipila na sa mga empleyado ang namaligya sa ilyang mid-year.
Giklaro sab sa gobernador ug gipaabot na niini nga dili niya ihatag ang mid-year bonus.
“For the employees... I know that it has been very challenging for you because some, not all actually, but a very minimal are requesting and asking about your bonus. No, I’m not giving... no, really I’m not giving,” pahayag niini ug nipasabot nga ang Joint Circular Memorandum sa DILG, DBM, ug CSC nag-ingon nga dili ihatag ang mid year bonus sa dili pa mag Mayo 15. Apan wala giingon nga later than June 30.
“If you read the mid-year bonus circular, dili ka maghatag masayo lang sa May 15. Wala siya giingon nga May 15. As long as it is of that year, pwede paka sa December, November, October,” butyag niini ug miingon nga kalangan sa papeles maoy nag-unang rason.
“Actually ang kwarta walay problema. Ang naay problema ang pagprocess. I really don’t know asa nasangit because I haven’t checked for a while, and I have no plans of needing it for a moment. So ngano ako paman pangitaon ang papel,” matud ni Emano.