Pugapo, dili lapulapu ang ipangan sa isda

MIDUSO karon si Lapu-Lapu City Congresswoman Paz Radaza ug balaudnon sa Kongreso nga magdili na unya sa pagtawag sa isdang “pugapo” ngadto sa “lapulapu.”

Kini human nakita ni Radaza nga ang naasoyng isda nga adunay scientific nga pangalan nga “plectropomus leopardus” naandan na nga tawgon sa pagkakaron og lapulapu inay sa naandan niining pangalan kaniadto nga pugapo.

Alang kang Radaza, ang naasoyng isda dili lapulapu ang orihinal nga tawag sa Kabisay-an ug Mindanao kaniadto hinungdaan nga nakahuna-huna siya ug duso sa House Bill No. 2223.

Gihimug-atan ni Radaza nga dili makataronganon ug dili angay nga itawag ang pangalan sa usa ka bayani sama ni Lapu-Lapu ngadto sa usa ka isda sanglit mahulog kini nga usa ka matang sa pagtamay sa pangalan sa usa ka bayani.

Kini bisan paman ug ang naasoyng isda usa sa kinaham dili lang dinhi sa nasod kundi sa ubang bahin sa Southeast Asia.

Mas maayong “pugapo” na lang ang itawag sa isda inay “Lapu-Lapu” nga maoy katuyoan sa balaodnon nga giduso ni Radaza.

Ubos sa maong balaodnon gimandoan ang National Historical Commission of the Philippines (NHCP) ug Bureau of Fisheries and Aquatic Resources (BFAR) sa pagsigurong mapatuman ang balaodnon.

Giawhag usab ang Philippine Information Agency PIA ug ubang local government unit (LGU) alang sa lapad nga pagpahibaw sa publiko hangtod nga makab-ot ang pagpatuman sa balaod tibuok nasod.

Mas maayo usab nga mosunod ang mga LGU sa pagpasar og ordinansa alang sa higpit nga pagpatuman sa balaodnon.

Ang maong balaodnon usa lamang sa tulo ka balaodnon nga giduso ni Radaza sa Kongreso sa paghatag og bili sa pangalan sa Oponganong bayani.

Si Lapu Lapu maoy maisip usab nga labing unang bayani sa nasod.

Unang giduso ni Radaza mao ang House Bill No. 2221 o ang balaudnon nga maghimong regular nga holiday lukop nasod ang Abril 27 sa matag tuig.

Sa maong petsa gihandom sa nasod ang “Kadaugan sa Mactan” nga nahitabo niadtong Abril 27, 1521.

Gawas niini pagatawgon usab ang Lapu Lapu Day o Adlaw ni Lapu Lapu sama sa ubang holiday sa nasod nga gipahinungod sa ubang bayani sama sa Rizal ug Bonifacio Day.

Ang Republic Act 11040 nga naghimong special working public holiday sa Abril 27 nahimo na untang balaod niadtong 2018 apan alang kang Radaza mas maayong himuon kining regular holiday isip paghandom saa nabuhat ni Lapu Lapu.

Ikaduhang balaodnon nga giduso usab ni Radaza sa Kongreso mao ang House Bill No. 2222 o ang paghingalan na sa Mactan Cebu iInternational Airport (MCIA) ngadto na sa Lapu-Lapu International Airport agi og pagyukbo usab sa bayanihong buhat sa Oponganong bayani.

Magpabilin gihapon nga ang Mactan Cebu International Airport Authority (MCIAA) ang modumala sa tugpahanan. (GCM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph