MAYOR Jonas Cortes sa Dakbayan sa Mandaue naalarma sa pagpusil sa piniriso nga si Romy Ramas sulod sa Mandaue City Jail niadtong Lunes, Hulyo 28, 2019.
Nimando si Cortes sa Bureau of Jail Management and Penology (BJMP) sa hugot nga inspection sulod sa pasilidad aron di na masubli ang hitabo.
Matod ni Cortes nga naalarma siya sa hitabo ug di na maayo nga masundan pa human sa duha na ka susamang insidente sulod sa bilanggoan.
“We have to strictly implement measures. Dunay mga gilabay diha nga from other places. But again we have to do something aron maputol ning yano ra kaayo nga makasulod ang deadly weapons,” matod sa mayor.
Gipahibawo ni Cortes nga nakighinabi na siya sa City Peace and Order Council (CPOC) alang sa mga lakang nga angay buhaton sa seguridad.
Susihon ni Cortes ang prisohan ingon man mangita og bag-ong luna nga kabalhinan sa City Jail nga anaa nahimutang sa dunggoan sa Brgy. Basak sa dakbayan. Alang niya, huot ug dili maayo nga mapalibotan og kabalayan ang prisohan kay sayon ra makapalusot. (ANV)