ANG Land Transportation Office (LTO) 7 mohawan sa mga national road gikan sa mga sakyanan nga gipataka og parada.
Kini isip tubag sa panawagan ni Presidente Rodrigo Duterte atol sa iyang State of the Nation Address ug silbing abag sa mga local government unit (LGU).
Labing unang karsada nga ilang hawanan ang N. Bacalso avenue.
Si LTO 7 Regional Director Vic Caindec nipadala na og komunikasyon ngadto kang Secretary Michael Dino sa Office of the Presidential Assistant for the Visayas (OPAV) niadtong Hulyo 25 para matugotan ang iyang buhatan sa pagpatuman sa duha ka lakang nga makapaluag sa dagan sa mga sakyanan.
Una, pag-tow sa mga sakyanan mga giparada sa mga no parking zone sa mga national higway.
Si Caindec, co-chairman sa Inter-Agency Council for Traffic (I-ACT) sa Central Visayas, nagkanayon nga kini maoy labing una nga sudlon sa LTO sanglit ang towing kasagaran trabaho sa LGU. Niini, ang LTO molagda og memorandum of agreement (MOA) tali sa usa ka towing company.
Ang towing company maoy moguroy sa mga sakyanan sanglit way ekipo ug igong lugar para impounding.
Prayoridad sa LTO 7 mao ang N. Bacalso Avenue nga nanukad gikan sa Santander sa habagatan ngadto sa Bogo City sa amihanan.
Isunod nila ang ubang national roads sa Dakbayan sa Sugbo ug kasikbit nga mga dapit.
Ikaduha nga lakang mao ang pagsagop sa Integrated Law Enforcement System (ILES).
Niini, ang LTO 7 mahatagan og access sa data labot sa traffic violations gikan sa LGU.
Matod pa ni Caindec nga kadtong mga traffic violator nga di maka-settle sa ilang bayranan sa LGU diin siya nadakpan, di maka-renew sa iyang driver’s license ug rehistro sa sakyanan inig abot sa renewal ug registration period.
“More importantly, adoption of this system is mutually advantageous to the LTO and LGUs collection of revenues, shall be ensured,”tipik sa suwat ni Caindec.
Sa Cebu City, si Mayor Edgardo Labella nagsugod na og pahawan sa mga karsada bisan kon wa pa ang kamanduan sa DILG.
Si Labella niingon nga human ilang nabalik sa publiko ang ML Quezon boulevard sa Barangay Ermita, daghan pang mga karsada nga ilang limpyohan.
Gitahasan na ni Labella ang Prevention, Restoration, Order Beautification, and Enhancement (PROBE) team ni Raquel Arce sa pagsuhid sa mga obstruction ug pagbalik niini ngadto sa publiko.
Gawas sa mga karsada, laraw usab sa mayor nga ipatuman ang three-meter easement sa kasapaan nga giokupahan sa mga business establishment.
Ang mayor nagkanayon nga human sa 60 ka adlaw, magpadayon ang Cebu City pagmintinar sa kahapsay sa kadalanan aron luwas agian sa mga sakyanan. Ang vendors maoy modisiplina sa ilang kaugalingon para di maapektohan ang mga pedestrian.
Discipline zone
Sugod karong adlawa, ilusad sa kapulisan sa Probinsya sa Sugbo ang discipline zone sa siyudad sa Talisay ug Minglanilla. Tanang lokal nga ordinansa ug national nga balaod ilang ipatuman.
Matod ni Cebu Police Provincial Office Police Colonel Roderick Mariano, ilang giuna ang Talisay ug Minglanilla.
Isunod dayon niya ang ubang mga lungsod aron makatabang sila sa programa ni Duterte paghawan sa kadalanan.
Ilang hawanan ang kadalanan gikan sa mga sakyanan nga gi-park sa kilid sa karsada. Ilang tangtangon ang mga estraktura nga nakababag sa agianan, lakip na ang basura sa lugar.
“Lahat nga problema sa discipline area na yun, we will focus lahat yun yung sa mga traffic, obstruction tatanggalin natin lahat yan,” matod ni Mariano.