Kapin sa P2 milyon nga balor si ilegal nga drugas ang nasakmit sa kapulisan sa Dakbayan sa Sugbo sa managlahing anti-drug operation Miyerkules sa gabii, Hulyo 31, 2019.
Unang nadakpan alas 8 sa gabii ang duha ka babaye ug ang kauban niining lalaki nga silang Lilibet Amaro Navales, 40, taga A. Lopez, Labangon, Cebu City, Lovelyn Joy Ramas Gomotong,18, nag tungha isip Senior High School sa usa ka tunghaan sa Dakbayan sa Sugbo ug Joemarie Villamor Suson, 22, lumad nga taga Agusan Del Sur.
Nadakpan sila pinasikad sa buy-bust operation sa Bliss, Barangay Labangon nga gipangulohan ni Police Major Henrix Bancoleta.
Nakuha gikan kanila ang mga dagkong putos sa gituohang shabu nga motimbang ang tanan sa 103 gramos ug mokantidad sa P700,400 diin ang duha ka babaye nalakip na sa high-value target sa Labangon Police Station.
Samtang pagka alas 10:40 gabii nasikop usab sa Carbon Police Station ang laing high-value target pinaagi sa buy-bust operation sa Sitio Pig Vendor, Barangay Ermita.
Ang nadakpan giila nga si Rolly Juros alyas "Ema," 21, nga nakuhaan sa iyang posisyon ang duha ka dagkong putos sa gituohang shabu nga motimbang ang tanan sa 200 gramos nga mokantidad sa P1,360,000.
Ang mga dinakpan moatubang sa kasong kalapasan sa Republic Act 9165, o ang Comprehensive Dangerous Drugs Act of 2002. (Superbalita Cebu)