TULO ka armadong tawo nga sakay sa usa ka private motorbanca nga gikan matud pa sa Ayungon, Negros Oriental ang nasikop sa Badian Police Station human nasigpatan sa Barangay Intelligence Network (BIN).
Matud ni Police Brigadier General Debold Sinas, hepe sa Police Regional Office Central Visayas, ang mga dinakpan aduna'y tagsa-tagsa ka mga armas.
Sa imbestigasyon sa Badian Police Station nga gihatag kang Sinas, nasuta nga nasigpatan sa BIN sa lungsod sa Badian ang kadudahang motorbanca nga gikan sa Negros.
Tungod niini gi-intercept nila ug nasuta nga aduna'y gihatod nga tulo ka tawo nga wala mailhi.
Gihimo dayon ang manhunt ug checkpoint sa Badian nga miresulta sa ilang pagkasikop.
Sa interogasyon nasuta nga ang usa mao kadtong nakaeskapo sa engkwentro sa Ayungon, Negros Oriental nga si Nerie Boy Banggala.
Miangkon matud pa kini nga mga sakop sila sa New People's Army nga naglihok sa Negros.
Tungod niining impormasyon gimando ni Sinas ang tanang pulis sa rehiyon nga bantayan ang mga dapit nga nag-atubang sa Negros sa posibilidad nga motabok sa Sugbo ang mga armado. (Superbalita Cebu)