PORMAL nang milingkod isip acting director sa kapulisan sa probinsya sa Bohol si Police Col. Jonathan Cabal kaganihang Huwebes sa buntag, Agosto 1, 2019.
Si Cabal maoy nihulip sa outgoing director sa Bohol Provincial Police Office (BPPO) nga si P/Col. Julius Cesar Gornez.
Ang turn-over of command gipangulohan mismo sa hepe sa Police Regional Office-Central Visayas (PRO 7) nga si P/ Brigadier Gen. Debold Sinas.
Usa sa mga programa ni Cabal sa iyang pag- pangulo sa kapulisan sa lalawigan sa Bohol mao ang paghatag sa hugot nga siguridad sa tibuok lalawigan ilabi na nga giila ang tibuok probinsya nga dayohonon sa mga langyaw ug lokal nga mga turista.
Dili na bag-o alang kang Cabal ang probinsya sa Bohol sanglit dugay siya nga nahimong hepe sa Regional Intelligence Division (RID) sa PRO 7 diin usa ang Bohol sa ilang mga target sa operation.
Internal security ang usa sa iyang ipatuman aron dili na masubli ang nahitabong pagsulod sa mga bandidong Abu Sayyaf sa Bohol duha ka tuig na ang nakalabay.
Mahimong hard hitting siya sa mga durugista sa Bohol ilabi na niadtong mga nanganti nga mosukol sa mga police.
Sa iyang bahin, si Bohol Governor Arthur Yap masaligon sa bag-ong director sa kapulisan sa probinsya sanglit nakaila na siya niini. Usa sa iyang mando kang Cabal nga hatagan lang ug siguridad ang tibuok probinsya sa Bohol alang sa kaluwasan sa molupyo ug mga turista nga mobisita sa lalawigan. (AYB)