BISAN tulo na lang kuno ka oras ang iyang kinatulgan, padayon ang negosyante nga si Aida Patana pagdugang sa mga kalihukan nga makahatag kaniyag katagbawan ug kalingawan ingon man makatabang sa isigkatawo.
Niadtong Sabado (alas 10-11 s.b.), gibuksan niya ang The Aida Patana Show sa 94.7 Energy FM.
Mga kasikas sa syobis ang hisgutan. Mga paagi sa pagpatigayon itudlo usab ug may higayon nga manghatag og ginagmayng puhonan sa mga palarang tigpaminaw.
Sa laing bahin, si Aida usab ang kandidata sa Pilipinas sa umaabot nga Mrs. World 2019 nga himoon sa France sa Oktobre. Bongga!
Best wishes, Aida!
•••
Sugod niadtong Lunes, may bag-o nang look ang Balitang Bisdak ug mas undanon nga pagdala sa mga balita sa panimalay sa mga suking tumatan-aw. Morag naa ra sa sulod sa sala sa mga nanan-aw ang news team (Bobby Nalzaro, Alan Domingo, Cecille Quibod-Castro, Chona Carreon, Lou Ann Mae Rondina ug Nikko Sereno) tungod kay pulihan og couches ang mga lamesa ug silya nga gamiton.
Dugang niini, mahimo pa gyud nga makasulod sa studio isip kabahin sa live audience kada Biyernes.
Nag-amping sila si Cecile ug Lou Ann sa ilang dagway aron pirme silang presko tan-awon atubangan sa camera. Lubos puti pirme ang gisul-ob ni Bobby kay mas motaas ang iyang pagsalig sa kaugalingon ug bati-on niya nga di siya mawani bisan sa taliwala sa daghang tawo.
Uban sa tagline, “Balitang Bisdak, bugtong kasaligan, kasandigan ug kadangpan sa mga Bisaya,” makita gihapon kini kada alas 5 s.h., Lunes hangtud Biyernes.
•••
Gusto gyud untang moanhi sa Cebu sila ni Kathryn Bernardo ug Alden Richards aron pag-promote sa Hello, Love, Goodbye (gipasalida na sugod sa Miyerkules) pero dunay mga kakuli-an nga nakapugong. Nangayog pasaylo ang duha sa ilang mga magdadayeg.
Naka-video chat sa E-Group ang duha adtong Dominggo sa balay mismo sa promo diva nga si Josie Pereyra. Gusto gihapon sa duha nga magkauban sa laing proyekto kon may kahigayonan.
Matud ni Kathryn ug Alden, bag-ong istorya ug bag-ong paresan ang bentaha sa Hello, Love, Goodbye ug nanghinaut ang duha nga mosuporta ang ilang fans.