DILI ikalimod nga daghang nindot nga tourist attraction sa dakbayan sa Iloilo, sakop sa lalawigan sa Panay ug dili kini matawag nga “The Heart of the Philippines” ang maong dapit kon wala kiniy ikabuga.
Nagpangamay ang Spanish colonial architectural design nga mga simbahan, mga karaang balay, sikat ug timeless nga Ilonggo food ingon man ang mga nindot nga beach.
Gawas niini, aduna pay nakatago nga atraksyon ang Iloilo nga makita sa bukirang barangay sa lungsod sa Leon nga mao ang Barangay Bucari nga gi-ila nga “summer capital of Iloilo” kon “little Baguio.”
Kon nangita ka og laing matang sa adventure sama sa trekking o falls hopping nga anaa lang sa Iloilo o nangita og bugnaw nga dapit sa kabisay-an, perfect getaway ang Bucari.
Unsaon pag-adto
Dili na lisud ang pag-adto sa Iloilo sanglit adunay flights ang gitanyag sa mga airline company ug biyahe sa mga roro nga gikan sa Cebu.
Kon manukad sa Iloilo City, mosakay og jeep padulong sa lungsod sa Leon nga molanat ngadto sa 45 minutos ngadto na sa usa ka oras nga biyahe.
Duha ka oras gikan sa lungsod sa Leon padulong sa Bucari sakay sa jeep o habal-habal apan limitado ang biyahe sa jeep padulong sa bukid maong importante nga planuhon daan ang trip.
Mas barato ang jeep nga mo-plete lang og 35 pesos itandi sa habal-habal nga 250 pesos/one way.
I-andam ang jacket gumikan sa kabugnaw sa temperatura sa Bucari, imong masud-ong ang mga pine trees, lapad nga mountain ridges, rice ug vegetable terraces nga maoy mosugat sa imong pag-abot.
Ang Bucari ang nag supply sa dako nga porsyento sa mga utanon sa lungsod sa Leon ug siyudad sa Iloilo.
Bucari Pine Forest
Mamahimong day hike o mag camping overnight sa dapit ilabi na nga adunay mga paabangan nga kwarto ug tent sa Bucari Pine Forest and Campsite nga gipadagan sa local government unit sa Leon.
Gamay man nga barangay, dili ka mahutdan og lami-an ug baratong karenderya nga anaa lang duol sa campsite.
Ayaw sipyata ang pagtilaw sa linagpang – sinabawang sinugba nga bisayang manok apan bisan kon layo sa siyudad apan ang barangay nagtanyag sab og ilahang bersyon sa batchoy.
Itandi sa mga batchoy nga anaa sa La Paz market sa Iloilo City, para nako mas lami ang batchoy sa Bucari sa kantidad nga P30, wala ka gitipid sa sagul ug sa lasa.
Dili kompleto ang Bucari experience kon dili mag trek sa Mt. Mansiga/Mansiga View Deck. Moabot ngadto sa 30 ngadto na sa 40 minutos ang trail padulong sa Mansiga ug aron ma-appreciate nimo ang kinaiyahan, mas maayong mag trek sa kadlawon aron mosugat sa pagsubang sa adlaw.
Human sa trek, mamahimong mag falls hopping sa Sitio Camandag ug mobisita sa strawberry farm.
Matud sa mga residente, daghang turista sa Bucari matag semana santa tungod sa ubos nga temperatura ug haom ang dapit alang sa Stations of the Cross.
Sa pagkakaron, inanay nang midani ang barangay og mga turista ug nanghinaot ang mga residente nga subay sa pag usbong sa turismo sa lugar, mamintinar gihapon ang kanindot, kalimpyo ug sa kamalinawon sa ilang gitawag og bahandi.