KULBAHINAM ug tugob sa aksyon ang gipaabot nga masaksihan karong gabii sa dihang mag-abot na ibabaw sa ring ang duha ka lightweight stars ug mga kanhi world champions nga sila si Eduard “Landslide” Folayang sa Pilipinas ug Eddie “The Underground King” sa United States sa ONE Lightweight World Grand Prix semi-final matchup sa ONE:Dawn of Heroes sa Mall of Asia Arena.
Si Folayang sayod nga usa ka dakong misyon ug hagit sa iyang career ang pagpakigbatok sa kanhi UFC ug Bellator champion nga si Alvarez, apan dako ang iyang pagtuo nga ang iyang styles haom sa estelo sa agresibong Alvarez.
“Yeah, for sure, [my style] matches up well [with his], and kailangan ko pang pinu-in yung mga areas na magiging precise, na magagamit ko against sa kanya,” matod ni Folayang nga nakutloan sa ABS-CBN Sports.
Si Alvarez naila nga usa ka do-or-die fighter nga dili gyud moatras nga nakapaagni og daghang mga fans niadtong higayon nga didto pa sa North Americans siya moaway.
Sa iyang bahin, si Folayang nakakulit usab og pangalan ginamit ang iyang mga makabungog nga strike.
Usa sa makabungog niyang kadaugan mao ang pag-knockout sa Japanese legend nga si Shinya Aoki niadtong 2016. Kadto mao niyang paghupot og world title sa ONE.
Ang kadaugan ni Folayang batok ni Alvarez maoy maghatag kaniya og kahigayonan nga makaaway sa dugay na iyang gihandom nga mao ang Grand Prix finals.
“Sa akin, siguro, it motivates me to do well, kasi siyempre, I wasn’t able to defend my belt the last time, I think this is a good opportunity for me to bounce back,” matod sa kanhi two-time champion. (JBM)