Rabacal: Lotto, swertres ug STL

GIBALIK na ang duwa sa lotto sa Philippine Charity Sweepstakes Office (PCSO) niadtong Hulyo 31, human kini gipahunong ni Presidente Rodrigo Duterte sud sa upat ka adlaw sugod niadtong Hulyo 26. Pero ang Small Town Lottery (STL), Peryahan ng Bayan ug Keno suspendido gihapon. Suma ni PCSO general manager Royina Garma nga mokita unta og P250 milyones ang maong ahensiya, sa lotto lamang, kon wala pa suspensuha ang mga duwa niini.

Gipabalik kuno sa Presidente ang duwa sa lotto human ang imbestigasyon nagpakita nga walay anomaliya ang maong duwa. Ang sugyot ni kanhi konsehal Boy Sato sa Carcar City, Cebu nga dili nalang unta pabalikon ang STL tungod kay kadaghanan niini gigamit nga pantalya sa iligal nga masiao sa Kabisay-an ug Mindanao ug jueteng sa Luzon. Tungod niini dili gani makatunga sa ilang halin ang mapunta sa panudlanan sa gobiyerno kay mas daghan man ang mga masiao ug jueteng ticket ang mabaligya kay sa legal. Ang ebedensiya niini mao ang daghan kaayong mga usher kun tigbaligya sa masiao nga hidakpan sa kapulisan nga gipiyansahan lang usab dayon sa mga operator sa STL. Kining swertres ticket maoy sundon sa mga financier sa masiao. Kon magpadayon man kining swertres, kinahanglang hugtan sa kapulisan ang kampanya sa iligal nga sugal. Kining mga dagkung mga nagpasiugda og sindikato sa iligal nga sugal sa tibuok nasud inila kaayo nga tawo. Gidudahan nga bisan kon nagpa-gwapo karon siya kang Presidente Duterte apan ang iyang mga bata-bata nagpadayon gihapon sa pagpadagan sa sindikato. Kinahanglang bantayan usab sa Malacanyang kining mga opisyal sa kapulisan ug military nga nagdawatan og dagkung payola gikan sa mga gambling lord. Mas maayo untang dunay imbestigasyon nga himuon ang kongreso kalabut niining iligal nga sugal kay akong irekomendar nga mga resource persons sila si Senador Ping Lacson, Chavit Singson, Dante Ang ug si Sandra Cam.

•••

Anaay balaudnon nga gi-file sa naprisong Senador Leila de Lima nga maghimong kalapasan sa election, sa premature campaigning, ang mga tawo nga mangampanya kon naka-file na sila sa ilang certificate of candidacy (COC). Sa pagka-karon gud dili pa man ilhong kandidato sa piniliay ug dili makalapas sa gimbut-an sa balaud kon mangampanya siya bisan kon naka-file na siya sa iyang (COC) kon wala pa ang opisyal nga panahun sa pagpangampanya sigun sa gimbut-an sa Commission on Elections (Comelec). Ang girekomendar nga silot mao ang pag-disqualify kaniya isip kandidato o kaha kon modaog nga dili siya mahimong makalingkod.

(mannyrabacal1144@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph