Barrita: Height requirement sa mga pulis

GIPANGUTANA si kanhi Presidente Abraham Lincoln, nga may barug nga 193 centimeters o 6 feet 3 inches, susamag height ni Presidente Donald Trump, kon unsa man gyud ang saktong height sa usa ka tawo. Ang importante, matod pa niya, nga ang tiil sa tawo, gikan sa hawak motugkad sa sawog.

Apan dunay height requirement nga gisubay ang mga sakop sa Philippine National Police (PNP), Bureau of Fire Protection (BFP) ug sa Bureau of Jail Management and Penology (BJMP).

Ang Republic Act 6975 nagmando nga ang dawaton sa pagkapulis kinahanglang nga adunay barug nga labing menos 157 centimeters o five feet, two inches sa mga babaye ug 162 centimeters o five feet, four inches sa mga lalake. Samang height gisitar ubos sa Republic Act 9263 alang sa mga sakop sa BFP ug BJMP.

•••

Si Kongresista Pablo John “PJ” Garcia sa Cebu third district mipasaka sa House Bill No. 2242M ang “PNP, BFP and BJMP Height Equality Bill” mga mag-abolish sa maong height requirement.

Matod pa ni Garcia ang pagkamubo di babag sa pag-alagad sa katawhan isip usa ka pulis, bombero o jailguard. “There is absolutely no empirical evidence that people who possess the mandated minimum height would be more effective and efficient police, jail or fire officers than those who do not,” matod pa niya.

Bitaw di makiangayon ang maong height requirement. Daghang mga makamao nga wa madawat sa pagkapulis kay kuwang sa height. Ang uban nakasud kay nakakuhag height waiver kay nikalit lang nga nahimong nitibo.

•••

Napasar ang unang balaudnon nga gipasaka ni PJ Garcia nga mag-abolish sa height requirement sa PNP, BFP ug BJMP sa una niyang termino sa pagkakongresista niadtong 2012. Aprobado sab ang counterpart bill sa Senado ni Senador Gringo Honasan.

Apan gi-veto kini ni kanhi presidente Benigno Simeon “Noynoy” Aquino III sa 2013 sa katarungan nga nabalaka siya sa “public safety.” Nahadlok tingali siyang makapusil ang mga mugbo nga pulis kay bugal-bugalan nga pulis putot.

Matawag sab ang height requirement nga discrimination sa mga tawong mugbo. Total ang mga sakop sa PNP, BFP ug BJMP di bitaw gamiton nga kuhit.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph