HUMAN sa State of the Nation Address (Sona) ni Presidente Rodrigo Duterte, diin iyang gimandoan ang mga ahensya sa kagamhanan nga hawanan ang mga karsada ug iuli ngadto sa mga motorista ug pedestrian, mga local government unit (LGU) nanglusad og mga clearing operation.
Sa Dakbayan sa Sugbo, gipanghinginlan ang mga vendor daplin sa kadalanan, apil na ang mga pundok sa mga habalhabal. Gipang-clamp usab ang mga sakyanan nga gi-overnight parking.
Nagplano usab ang Land Transportation Office (LTO) 7 sa paghawan sa mga sakyanan nga ilegal nga gi-park sa Natalio Bacalso National Highway gikan sa south ngadto na sa northern Cebu.
Dugay na kaayo ang problema sa mga babag sa karsada. Sa urban centers, ang numero unong problema mao ang sidewalk vending nga nakahasol di lang sa mga motorista, apil na sa mga pedestrian. Kon wa sa sidewalk maninda, naa daplin sa karsada.
Di unta modako kining mao nga problema kon gikontrolar na sa mga LGU ang gidaghanon sa mga sidewalk vendor. Ila usab unta nga gipangitaan og mga dapit nga mahimong katindahan kay nanginabuhi ra usab kining mga tawhana. Maayo gani kay wa sila mamaligya og shabu.
Sa paghawan sa mga highway, di kini sayon kay limitado ang manpower sa LTO 7. Busa nagpatabang sila kang Secretary Michael Dino sa Office of the Presidential Assistant (Opav) aron kuhaon ang kooperasyon sa mga LGU.
Gimbuhaton unta sa mga LGU ang paghawan sa mga karsada ubos sa ilang area of jurisdiction isip tipik sa traffic management. Apan makita sa national highways ang mga sakyanan nga i-park tibuok gabii sa daplin sa karsada, uban niini maoy nakaingon sa makamatay nga mga aksidente.
Apan ang laing sagubangon nga problema sa gobyerno mao ang pagsustener sa mga operasyon kay naila na ra ba ang Pinoy nga maayo lang sa sugod.